Meksıkanyń birneshe shtatynda tabıǵı apat saldarynan jaǵdaı ýshyǵyp tur. Ulttyq azamattyq qorǵaý úılestirý basqarmasynyń (CNPC) málimetinshe, «Prıssılla» jáne «Raımond» tropıkalyq daýyldary týdyrǵan nóser jańbyr ótken aptadan beri tolastamaı, kóptegen eldi mekenderdi sý basqan.
Eń aýyr jaǵdaılar Verakrýs, Pýebla, Idalgo, Keretaro jáne San-Lýıs-Potosı óńirlerinde tirkelip otyr. Bul aımaqtarda myńdaǵan turǵyn úılerinen aıyrylyp, júzdegen adam evakýasııalanǵan.
Meksıka prezıdenti Klaýdııa Sheınbaým Ulttyq saraıda ótken baspasóz jıynynda apat aımaqtaryna kómek kórsetý jumystary kúsheıtilgenin habarlady. Onyń aıtýynsha, izdestirý-qutqarý toptary úzdiksiz eńbek etip, turǵyndarǵa azyq-túlik, aýyzsý, kıim jáne dári-dármek jetkizilip jatyr.
Jergilikti BAQ derekterine qaraǵanda, bul sońǵy jyldardaǵy eń aýqymdy sý tasqyny bolyp otyr. Tabıǵı apattan 250 myńnan astam adam zardap shegip, 50 myńǵa jýyq turǵyn úı zaqymdanǵan.
