Sáken Seıfýllın – qazaq ádebıetiniń jańa dáýirin bastaǵan uly qalamger ári ulttyq memlekettiliktiń qalyptasýyna zor eńbek sińirgen tulǵa. Azamat soǵysy jyldarynda el birligi úshin kúresip, keıin el basqarý isine belsene aralasqan ol 1922 jyly Qazaqstan Halyq Komıssarlary Keńesiniń tóraǵasy qyzmetine taǵaıyndaldy.
Ult zııalysynyń el aldyndaǵy eń úlken eńbekteriniń biri – halqymyzdyń tarıhı ataýyn qaıtarýy edi. Sol ýaqyttarda qazaq halqy resmı qujattarda «qyrǵyz» dep atalyp kelgen. Sáken Seıfýllın bul burmalaýshylyqqa qarsy shyǵyp, «qazaq» ataýyn qalpyna keltirý týraly máseleni úkimet deńgeıinde kóterdi.
Sonymen qatar Sáken resmı is qaǵazdary qazaq tilinde júrgizilýi qajet ekenin alǵashqylardyń biri bolyp talap etti. Bul ult tiliniń memlekettik deńgeıde qoldanylýyna, qazaq tiliniń mártebesin arttyrýǵa jol ashty.
Sáken Seıfýllınniń ádebı murasy da ult rýhanııatynyń altyn qoryna endi. «Tar jol, taıǵaq keshý» romanynda kúres pen el taǵdyryn shynaıy beınelese, «Kókshetaý», «Ekspress», «Albatros» poemalarynda jańa dáýirdiń tynysyn jyrlady.
О́mirin ultyna arnaǵan Sáken Seıfýllın 1938 jyly jazyqsyz qýǵyn-súrgin qurbany boldy.
