Foto: Ashyq derekkóz
Týrnırdiń úshinshi raketkasy atanǵan bul jup Germanııa ókili Laýra Zıgemýnd pen amerıkalyq Sofııa Kenınge qarsy oınap, aıqyn basymdyq tanytqan.
Birinshi partııada qazaqstandyq pen serbııalyq tennısshi senimdi oıyn kórsetip, qarsylastaryn 6:2 esebimen tize búktirdi. Ekinshi sette tartys kúsheıip, Zıgemýnd pen Kenın 3:1 esebimen alǵa shyqqan bolatyn. Degenmen Danılına men Krýnıch sheshýshi sátterde jınaqylyq tanytyp, matchty 7:5 esebimen aıaqtady.
Oıyn 1 saǵat 37 mınýtqa sozylǵan. Osy ýaqytta jeńimpaz jup 3 eıs jasap, 12 breık-poınttyń altaýyn tıimdi paıdalandy. Al qarsylastary bir eıs jáne úsh breıkpen shekteldi.
Kelesi aınalymda Anna Danılına men Aleksandra Krýnıch amerıkalyq Nıkol Melıchar-Martınes pen reseılik Lıýdmıla Samsonova jubyna qarsy oınaıdy.
Aıta keteıik, Danılına men Krýnıch ótken aptada Ýhan qalasynda ótken WTA 1000 týrnırinde fınalǵa deıin jetip, úzdik nátıjege qol jetkizgen edi.
