«Sáýkelemizdiń bıiktigi kókpen talasyp, shyńmen tiresip tursyn dedik. Sondyqtan ony 5 metr 20 santımetr etip jasadyq. Al, oıý-órnegin tereń maǵynamen kómkerýdi jón kórip, sáýkeleniń keıpinen Jer ananyń beınesin jasadyq. Bir qolymen álemdi, bir qolymen besikti terbetken Ana – ómirdiń máńgiligin, tirshiliktiń túp-tamyryn bildiredi. Sol sebepti oıýyn ómir aǵashy beınesinde órnektedik», dedi joba avtory Aqmaral Daýylbaeva.
Biregeı eksponat 30-dan astam túrki halyqtarynyń oıý-órnekterimen bezendirilgen. Áıelderge arnalǵan ulttyq bas kıimniń bıiktigi 5 metrden assa, jabýy 600 metr. Sonymen qatar, sáýkele halyqaralyq «Global Book of Records» rekordtar kitabyna enip, arnaıy sertıfıkat tabystaldy.
Qazaqstannyń rekordtar kitabynyń resmı ókili Qýandyq Qudaıbergenov Túrkistanǵa arnaıy kelip, sáýkeleniń rekordtyq mártebesin resmı túrde jarııalady. Ol álemde mundaı úlken bas kıimdi eshkim jasamaǵanyn, jobany Gınnestiń úshinshi álemdik rekordtar kitabyna engizý úshin tirkeý bastalǵandyǵyn málim etti.
