Oblys ákimdiginiń qoldaýymen ótken úshinshi forýmǵa kreatıvti ındýstrııa, tehnologııa men jastar saıasatyna úles qosyp júrgen tanymal sarapshylary men óner juldyzdary shaqyryldy. Sheberlik saǵatyn ótkizip, tájirıbesimen bóliskender arasynda jas kompozıtor, ári óńdeýshi Ediljan Ǵabbasov, ánshiler Ǵalymjan Moldanazar men Beıbit Kóshqalıev bar. Olar qazaq ónerin damytýdyń qyr-syry týraly áńgimeledi.
Jastardy kún saıyn myń qubylatyn naryqtaǵy marketıng te qyzyqtyrady. Osy salanyń bilgiri Aqsultan Qalıev arnaıy dáris ótkizdi. Al prodıýser, ssenarıst Anar Júnisova men rejısser Aıtóre Joldasqalı kınematografııany óristetý baǵytyndaǵy oıyn aıtty. Sondaı-aq Baýyrjan Seıfýllın men Evgenııa Lı horeografııadan baǵyt berdi. Teatr jáne kıno akterleri Dýlyǵa Aqmolda men Ádil Ahmetov keıipker somdaý qyryn taldady.
Búgingi qoǵamdy tolǵandyratyn jaıttyń biri – jasandy ıntellekt. Atalǵan forýmda jas býynnyń belsendi ókilderi Baqdaýlet Bekjanov pen Azamat Ǵalymjanov naryqqa dendep enip, barlyq salada baıqala bastaǵan jańa qubylystyń jaı-japsaryna keńinen toqtaldy.
«Bul forým kreatıvti ındýstrııaǵa tyń serpin beretinine senemiz. Elimizdiń kreatıvti jastary ekonomıkany damytýǵa, onyń ishinde shıkizatty óńdeý salasyn ǵana emes, ulttyq qundylyqtardy saqtaýǵa, mádenıet pen ónerdi jan-jaqty tanytýǵa úles qosyp keledi», dedi oblys ákiminiń orynbasary Daryn Shamuratov.
Forýmda Baǵyt Bısembaı (horeografııa), Ánýarbek Maǵzomov (marketıng), Mahambet Ábilov (mýzyka), Nurpeıis Ádilov (kınematografııa), Qýanyshbek Aısaǵalı (teatr), Erkebulan Balǵabekov (jasandy ıntellekt) úzdik dep tanyldy. Olardyń árqaısysyna 500 myń teńgeden syıaqy berildi.
Atyraý oblysy
