Foto: istockphoto.com
Álem boıynsha taǵy shamamen 3,5 mıllıard adam kúnine 6,85 dollardan az tabys tabady eken. Bul kórsetkish kóptegen orta tabysty elder úshin de kedeılik sheginen tómen sanalady.
Birikken Ulttar Uıymynyń Bas Assambleıasy 17 qazandy — Kedeılikpen kúresýdiń dúnıejúzilik kúni dep jarııalaǵan. Jyl saıyn bul kúni álem elderinde kedeıliktiń saldary men onyń aldyn alý joldaryna qoǵam nazaryn aýdartýǵa baǵyttalǵan is-sharalar ótedi.
BUU esebine sáıkes, COVID-19 pandemııasynan keıin kedeılik deńgeıi qaıta ósip, 2019 jyldan beri aıtarlyqtaı tómendemegen. Qazir jer sharyndaǵy halyqtyń shamamen jartysy óz elderinde kedeılik sheginen tómen ómir súrip jatyr.
Visual Capitalist onlaın-platformasy men Halyqaralyq valıýta qorynyń 2025 jylǵy «Álemdik ekonomıkalyq boljamdar» esebine saı, álemniń eń kedeı memleketteriniń kóbi Afrıka qurlyǵynyń Saharanyń ońtústigindegi aımaqtarynda ornalasqan.
Bul tizimniń basynda Ońtústik Sýdan tur. Munda jan basyna shaqqandaǵy JIО́ nebári 251 dollar. Odan keıin Iemen (417 dollar), bul tizimdegi Taıaý Shyǵystaǵy jalǵyz el. Úshinshi orynda Býrýndı (490 dollar), tórtinshi orynda Ortalyq Afrıka Respýblıkasy (532 dollar), odan ári Malavı (580), Madagaskar (595), Sýdan (625), Mozambık (663), Kongo Demokratııalyq Respýblıkasy (743) jáne Nıger (751 dollar).
Sońǵy 25 jylda kedeılikti azaıtýda eń úlken jetistikke Shyǵys jáne Ońtústik Azııa elderi jetken. Degenmen, BUU boljamynsha, 2030 jylǵa qaraı álem halqynyń 7,3 paıyzy áli de kúnine 2,15 dollardan az tabys tabatyn bolady. Bul shamamen 69 mıllıon adam ǵana kedeılikten shyǵa alady degen sóz.
Kedeılikti joıý BUU-nyń 2030 jylǵa deıingi Turaqty damý maqsattarynyń eń basty baǵyty. Uıym bul máseleni sheshý tek ekonomıkalyq emes, áleýmettik ádilettilik pen turaqty damý úshin de mańyzdy ekenin atap ótedi.
