2028 jylǵa deıingi sý salasyn damytý jónindegi keshendi jospar aıasynda Aqsý, Kóksý, Panfılov, Sarqan, Alakól aýdandarynda jáne Taldyqorǵan qalasynda 8 jańa sý qoımasyn salý kózdelgen. Nysandar Bıen, Bije, Qorǵas, Úsek, Tyshqan, Balyqty, Jamanty jáne Basqan ózenderi boıynda salynady.
Budan bólek, úsh sý qoımasyn jáne uzyndyǵy 2930 shaqyrym bolatyn kanaldy rekonstrýksııalaý, sondaı-aq uzyndyǵy 236,8 shaqyrym kanaldy avtomattandyrý josparlanyp otyr. Sonymen qatar 17 gıdrotehnıkalyq qurylysjaıda kópfaktorly zertteý jumystary júrgiziledi.
«Bizdiń jumysymyzdyń basym baǵyttarynyń biri – sý sharýashylyǵy ınfraqurylymyn jóndeý jáne jańǵyrtý. Qazir júzege asyrylyp jatqan gıdrotehnıkalyq qurylysjaılardy salý men rekonstrýksııalaý, ırrıgasııa jelilerin avtomattandyrý jobalary sýdy paıdalaný tıimdiligin aıtarlyqtaı arttyryp, onyń shyǵynyn azaıtýǵa múmkindik beredi. Vegetasııa kezeńiniń qorytyndysy kórsetkendeı, agrarlyq sektordyń tıimdiligi sý resýrstaryn qanshalyqty saýatty jáne jaýapkershilikpen basqarýǵa baılanysty. Bul tek naqty josparlaýdy ǵana emes, sý salasyn júıeli damytýdy da talap etedi», dedi Sý resýrstary jáne ırrıgasııa mınıstri Nurjan Nurjigitov.
Kezdesý barysynda Jetisý oblysynyń turǵyndary mınıstrge sý únemdeý tehnologııalaryn engizýge jumsalǵan shyǵyndardy sýbsıdııalaý jáne egistik alqaptaryn sýarýǵa arnalǵan sý tutyný normalaryn qaıta qaraý máseleleri jóninde suraqtar qoıdy. Keıin Nurjan Nurjigitov azamattardy jeke qabyldap, gıdroelektr stansııalary men bógetterdiń qurylysy, ırrıgasııa kanaldaryn jóndeý sııaqty taqyryptar boıynsha suraqtarǵa jaýap berdi.
