TÚRKSOI halyqaralyq uıymynyń Bas hatshylyǵynda ótken saltanatty is-shara TÚRKSOI men túrkitildes elder arasyndaǵy mádenı yntymaqtastyq pen baýyrlastyqty nyǵaıtýǵa baǵyttaldy.
Is-sharaǵa Mańǵystaý oblysy ákiminiń orynbasary Tilegen Ábishev, Aqtaý qalasynyń ákimi Ábilqaıyr Baıpaqov, Qazaqstan Respýblıkasynyń Túrkııadaǵy Tótenshe jáne О́kiletti elshisi Erkebulan Sápıev, Mańǵystaý oblysynyń mádenıet, tilderdi damytý jáne arhıv isi basqarmasynyń basshysy Nurtas Salı, TÚRKSOI Bas hatshysy Sultan Raev, Túrkııa Respýblıkasynyń Mádenıet jáne týrızm vıse-mınıstri doktor Serdar Cham, sondaı-aq AK partııasy tóraǵasynyń orynbasary professor doktor Kúrshad Zorlý men Ankara qalasynyń gýbernatory Vasıp Shahın bastaǵan mártebeli meımandar qatysty.
TÚRKSOI Bas hatshysy Sultan Raev óz sózinde syıǵa tartylǵan aǵash úı birlik pen yntymaqtyqtyń nyshanyna aınalatynyn atap ótti.
-Aqtaý — Túrki dúnıesiniń mádenıet astanasy mártebesin úlken abyroımen alyp júrip, Kaspıı teńiziniń injý-marjanyna, túrki mádenıetiniń toǵysqan núktesine aınaldy. Syıǵa tartylǵan bul aǵash úı – birlik pen yntymaqtyń kóne nyshanyna aınalady. Osy oraıda Mańǵystaý oblysynyń ákimi Nurdáýlet Igilikulyna tartý úshin alǵysymyzdy bildiremiz, - dedi Sultan Raev.
Aqtaý qalasynyń ákimi Ábilqaıyr Baıpaqov Aqtaýdyń túrki áleminiń mádenı astanasy bolýy mártebe men úlken jaýapkershilik ekenin aıtty.
-Aǵash úı – ata-babalarymyzdyń ómir súrý keńistigi ári rýhanı mádenıetimizdiń ajyramas bóligi. TÚRKSOI men túrki baýyrlarymyzǵa tartý etken bul syı – baýyrlastyǵymyzdyń jáne ortaq mádenıetimizdiń kórinisi. Aqtaýdyń túrki áleminiń mádenıet astanasy bolý – zor mártebe ári jaýapkershilik. Osy mártebe aıasynda ótken barlyq is-sharalarda baýyrlarymyzdy qýana qarsy aldyq. Barshańyzǵa shynaıy alǵysymyzdy bildiremiz, - dedi Ábilqaıyr Baıpaqov.
Saltanatty is-shara mańǵystaýlyq ónerpazdardyń merekelik baǵdarlamasyna ulasty.
