Tabıǵat tilimen sóıleıtin aqyn

Keshe Mańǵystaý oblysy mádenıetiniń Astana qalasyndaǵy kúnderi aıasynda «Shabyt» shyǵarmashylyq ortalyǵynda aqyn Ońaıgúl Turjannyń ádebı sazdy-dramalyq «Teńizder de shóldeıdi» atty shyǵarmashylyq keshi ótti. Jyr keshine kórnekti qalamger Ábish Kekilbaev, tanymal ǵalym Myrzataı Joldasbekov bastaǵan bir top zııaly qaýym ókilderi, Astana qalasy ákimdiginiń jaýapty qyzmetkerleri  qatysty. Aqyn, fılologııa ǵylymda­rynyń kandıdaty Ońaıgúl Turjan búginde L.N.Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fa­kýltetiniń dosenti. Ol sondaı-aq, Farıza Ońǵarsynova apamyz negizin qalaǵan «Tumar» jýrnalynyń bas redaktory, ǵalym-zertteýshi, aýdarmashy. Jyr keshiniń ıesi osyǵan deıin «Samal», «Sherqala», «Jyr kitaby» sııaqty birneshe kitaptardy shyǵaryp úlgergen talant ıesi. Osyndaı eńbekteri úshin Tólegen Aıbergenov atyndaǵy ádebı syı­lyqtyń laýreaty atanǵan. Mazmundy óleńderimen kóp­shilik yqylasyna bólengen Ońaı­gúl Turjan óziniń jyr keshin­de baspasóz ókilderine suhbat berdi. «Búgingi qoǵamdy túzý jol­ǵa salyp, tárbıeleıtin qural – óleń, – dedi aqyn. – Negizinen men ózim­niń óleńderimdi bir sholyp qarap ótsem, azattyqqa jetkenge deıingi, azattyqty alǵannan keıingi jaǵdaılar tabıǵattyń tilimen sóılegen eken. Sol tabıǵattyń tilimen sóılegen bostandyq týraly, sol bostandyqty alǵan­nan keıingi kóńil-kúıimizdi jet­kize­tin óleńderdi jınaqtap, azattyq týraly osyndaı keshti uıymdastyryp jatyrmyz». «Teńizder de shóldeıdi, sharshatty ony kúngeı lep. Jartasqa da senbeıdi, arǵy tegiń qum ǵoı dep»,  – dep keletin óleń joldarynan ta­bıǵat, qum, jýsan, teńiz tolqyny bolyp til qatyp,  jan-júregimen obrazǵa kire biletin aqyn sheberligi men shynaıylyǵy jyr keshine jı­nalǵan kim-kimdi bolmasyn beıjaı qaldyrmady. Ásirese, sahnadaǵy beınetaspa arqyly kórsetilgen ásem tabıǵattyń kórkem kórinisteri aqyn jyrlarymen qosyla ushtasyp, ún­desip, oqyrman kóńilin tolqytyp, te­bi­rente bildi. Sóıtip, kórermen qaýymdy erekshe áserge bóledi. Raýshan TÁÝIRHANQYZY, jýrnalıst. Sýretti túsirgen Erlan OMAROV.