«Damý» qorynyń bergen málimetine súıensek, maýsym aıynda iske qosylǵan «О́rleý» baǵdarlamasy bıznesti naqty qoldaýdyń jańa múmkindigine aınaldy. Baǵdarlama sheńberinde ınvestısııalyq jobalar men aınalym qarajatyn tolyqtyrýǵa 12,6 paıyz mólsherlemesimen nesıe beriledi. Qarjylandyrý kólemi de qomaqty: ınvestısııaǵa – 7 mlrd teńgege deıin, aınalym qarajatyna – 3,5 mlrd teńgege deıin, merzimi 10 jylǵa deıin. Abaı oblysynda osy baǵdarlama boıynsha 47 jobaǵa 7,8 mlrd teńge nesıe berilgen. Bul týraly Semeı qalasynda bolǵan baspasóz týrynda aıtyldy.
«Bıyl Memleket basshysynyń tapsyrmasyna sáıkes jobalar qunyna qaraı eki kepildik qory iske qosyldy. Endi kásipkerde kepil múlki jetispegen jaǵdaıda, «Damý» qory eki jumys kúni ishinde 7 mlrd teńgege deıingi nesıege kepildik bere alady. Bul múmkindik aýyl sharýashylyǵy men óńdeý ónerkásibi sııaqty salalardaǵy júzdegen jobanyń júzege asýyna jol ashty», — dedi «Damý» qory Abaı oblysyndaǵy fılıalnyń dırektory Murat Qaıymbaev.
Onyń aıtýynsha, qor qyzmeti óńir ekonomıkasyn ártaraptandyrýǵa da serpin berip otyr. О́ńdeý ónerkásibi, agroónerkásip, medısına jáne áleýmettik saladaǵy jobalarǵa erekshe mán berilýde. Bul baǵyttar Prezıdenttiń «ınvestısııaǵa naqty suranys qalyptastyrý» jónindegi tapsyrmasyna saı keledi.
– 1 qyrkúıektegi málimet boıynsha Abaı oblysynda «Damý» qorynyń qoldaýymen 39,8 mlrd teńgege 426 joba júzege asyrylyp jatyr. Qoldaýdyń nátıjesinde kóptegen kásipkerler óndirisin ulǵaıtyp, mıkrobıznes deńgeıinen shaǵyn jáne orta bızneske ótip otyr. Bul óz kezeginde óńirdiń ekonomıkalyq belsendiligin arttyryp, jańa jumys oryndarynyń ashylýyna yqpal etti, – deıdi «Damý» qory Abaı oblysyndaǵy fılıalnyń dırektory Murat Qaıymbaev.
Semeı ormanynyń qoınaýyndaǵy «Eastwood» demalys bazasy kásipker Farhat Bekmetovtiń tabandylyǵynyń nátıjesinde órkendep keledi. Ol nysandy keńeıtý úshin «О́rleý» baǵdarlamasy arqyly jeńil nesıe alǵan. «Makaı» JShS 2002 jyldan beri kúnbaǵys maıy men soıa ónimderin óndirip, ónimin shetelge eksporttap otyr. Al «Agrolıder KAZ» kompanııasy zyǵyr men noqat tuqymdaryn eksportqa shyǵaryp, aıyna 2 myń tonna ónim óndiredi. Joba tolyq qýatqa shyqqanda 20 jańa jumys orny ashylady.
Abaı oblysyndaǵy bul jobalar – memlekettik qoldaýdyń naqty nátıjesin aıǵaqtaıdy. Kásipkerlikti damytýdyń jańa tetikteri óńir ekonomıkasyn ártaraptandyryp, jańa óndirister men jumys oryndarynyń kóbeıýine jol ashyp otyr.
Abaı oblysy
