Is-sharaǵa oblys ákiminiń birinshi orynbasary Nurjan Kalenderov, quqyq qorǵaý organdarynyń basshylary, Tótenshe jaǵdaılar departamentiniń ardagerleri men qyzmetkerleri qatysty.
Is-shara qyzmettik boryshyn oryndaý kezinde erlikpen qaza tapqan Halyq qaharmandary Meıirjan Aımanov pen Ǵazız Baıtasovtyń eskertkish-bıýstine gúl shoqtaryn qoıý jáne olardyń rýhyna taǵzym etýden bastaldy.
«Balasaǵun» ortalyq konsert zalynda jalǵasqan jıynda Nurjan Kalenderov erlik pen adaldyqty, batyldyq pen jaýapkershilikti tý etken qutqarýshylardy kásibı merekesimen quttyqtap, syn saǵatta aldyńǵy shepte júrgenderi úshin alǵys bildirdi.
О́ńirde tótenshe jaǵdaılardyń aldyn alý jáne olardy joıý barysynda erekshe kózge túsken qyzmetkerler marapattaldy. Olarǵa oblys ákiminiń «Oblysqa sińirgen eńbegi úshin» belgisi, Qurmet gramotasy men Alǵyshaty tabystaldy. Sonymen birge Tótenshe jaǵdaılar departamentine 10 teledıdardyń sertıfıkaty berildi.
TJD bastyǵy, polkovnık Arman Toqanov óz áriptesterine arnaýly ataqtar men «Tótenshe jaǵdaılar mınıstrligine 30 jyl» merekelik medalin tabys etti. Budan bólek, erlikpen qaza tapqan qutqarýshylardyń ata-analary men jubaılaryna qarjylaı sertıfıkattar berilip, erekshe qurmet kórsetildi.
Bul kúni qala ortalyǵyndaǵy alańda zamanaýı órt jáne qutqarý tehnıkalary men qondyrǵylarynyń kórmesi kópshilik nazaryna usynyldy.
