Foto: Abaı atyndaǵy QazUPÝ
Abaı ýnıversıtetiniń jańa Bilim berý ınstıtýtynyń ashylý rásimine QR Ǵylym jáne joǵary bilim vıse-mınıstri Gúlzat Kóbenova, ýnıversıtet rektory Bolat Tilep, sondaı-aq oqytýshylar men stýdentter qatysty.
Aıta keteıik, qazirgi tańda respýblıka boıynsha 70 myńnan astam muǵalim qajet, al 2025–2035 jyldar aralyǵynda bul kórsetkish 447 myńǵa deıin artady dep kútiledi.Osyny eskere otyryp, elordada ashylǵan Abaı ýnıversıtetiniń Bilim berý ınstıtýty jańa býyn pedagogterin daıarlaýǵa baǵyttalǵan.
«Bul Bilim berý ınstıtýtynyń ashylýy Prezıdent tapsyrmasy boıynsha júzege asyp otyr. Byltyr Abaı atyndaǵy QazUPÝ jáne L.Gýmılev atyndaǵy EUÝ konsorsıýmy negizinde jumysty bastaǵany belgili. Bıyl Abaı ýnıversıtetiniń sol ınstıtýty jeke óz aldyna shańyraq kóterdi. Oǵan ǵımarat bólip, jaǵdaı jasaǵan Astana qalasynyń ákimine jáne basy-qasynda bolǵan Abaı ýnıversıtetiniń basshylyǵyna zor alǵysymdy bildiremin», dedi sóılegen QR Ǵylym jáne joǵary bilim vıse-mınıstri Gúlzat Izbasarqyzy.
Munda qazirgi zaman talabyna saı jabdyqtalǵan aýdıtorııalarda 9 bilim berý baǵdarlamasy boıynsha 400-den astam stýdent oqıdy. Olardyń 288-i memlekettik grant ıegeri bolsa, 133 stýdent Astana qalasy ákiminiń granty negizinde bilim alyp jatyr.
Instıtýt quramynda 3 ǵylym doktory, 4 ǵylym kandıdaty, 2 PhD ıegeri jáne 20-dan astam tájirıbeli oqytýshy jumys isteıdi. Stýdentter matematıka, ınformatıka, jaratylystaný, psıhologııa, defektologııa, logopedııa, tıflopedagogıka jáne sýrdopedagogıka sııaqty joǵary suranysqa ıe baǵyttar boıynsha bilim alady.
Al ýnıversıtet rektory Bolat Tilep stýdentterge arnaǵan quttyqtaýynda: «Sizder Prezıdenttiń tikeleı tapsyrmasymen daıyndalyp jatqan kadr bolǵandyqtan, erteńgi memleket bolashaǵyna qyzmet etetin sapaly maman bolýlaryńyz kerek», degen aqjarma tilegin jetkizdi.
Búginde Abaı ýnıversıteti men Astana qalasy ákimdigi ózara memorandým negizinde yntymaqtastyq ornatqan. Osy kelisim aıasynda stýdentter elordalyq mektepterde tájirıbeden ótedi. О́tken jyly 200-den astam stýdent muǵalimdik tájirıbeden sátti ótken. Bul joba aldaǵy jyldary elimizdiń soltústik aımaqtaryndaǵy muǵalim tapshylyǵyn azaıtýǵa eleýli úles qosady dep josparlanǵan.
