Foto: istockphoto.com
Úkimettiń baspasóz qyzmetiniń málimetinshe, qazirgi tańda Qazaqstan boıynsha 6 179 eldi mekenniń basym bóligi baılanyspen qamtylǵan. Olardyń ishinde 119 qala men 4 906 aýylda ınternet jelisi bar. Aýyldyq eldi mekenderdiń 2 724-i 3G, al 2 182-si 4G tehnologııasy arqyly qosylǵan. Sonymen qatar 1 902 aýyl ADSL jelisi arqyly, al 2 654 aýyl talshyqty-optıkalyq baılanys júıesimen (TOBJ) ınternetke tirkelgen.
«2027 jyldyń sońyna qaraı taǵy 3 myń aýyldy joǵary jyldamdyqty ınternetke qosý josparlanýda. Qosymsha 504 shalǵaı eldi mekendi spýtnıktik tehnologııalardy paıdalana otyryp jelige qosý josparlanýda. Onyń 176-sy KazSat arqyly baılanyspen qamtamasyz etilgen, al 2025 jyldyń sońyna deıin taǵy 328 aýyl OneWeb arqyly qosylatyn bolady», delingen habarlamada.
Mańyzdy jańalyqtardyń biri — 2025 jylǵy maýsymda Starlink kompanııasymen jasalǵan kelisim. Osy kelisimniń arqasynda 13 tamyzdan bastap Starlink Qazaqstan aýmaǵynda resmı túrde qyzmet kórsete bastady. Qazirdiń ózinde bul spýtnıktik ınternet júıesi 1,7 myńnan astam aýyl mektebin ınternetpen qamtamasyz etip otyr.
Jalpy alǵanda, 2025–2027 jyldar aralyǵynda úsh myńnan astam aýyldyq eldi meken joǵary jyldamdyqty ınternetke qosylyp, aýyl turǵyndarynyń sıfrlyq múmkindikteri aıtarlyqtaı keńeımek.
