Sýretti túsirgen – avtor
«Basynda kúıeýim Toǵanas qystaǵynda sharýa qojalyǵyn quryp, mal ustady. Keıin sıyr saýyp, sútin kádege jarataıyq dep, shaǵyn seh ashtyq. Muny Bozanbaı aýylynyń ákimdigi qoldap, «Aýyl amanaty» baǵdarlamasy arqyly 2,5%-ben 9 mln 400 myń teńge nesıe qarajatyn aldym», deıdi tórt balanyń anasy Merýert Toqyntaeva.
Nesıe qarajatyna sút óńdeıtin, irimshik qaınatatyn jáne qaqtaıtyn qondyrǵylar, azyq-túlikti saqtaıtyn tońazytqysh, basqa da qural-jabdyqtar satyp alǵan. Toǵanastaǵy shaǵyn sehta sútten 14 túrli ónim óndiriledi. Sút pen aırannan bólek, maı, kilegeı, irimshik, san túrli qurt osy aýyldan shyǵady. Tipti talshyqty irimshikke deıin jasaıdy. Shıkizatty sharýa qojalyǵynan ǵana emes, Bozanbaı aýylynyń turǵyndarynan da jınaıdy.
«Qurt-irimshikke tapsyrys beretinder az emes. Ásirese toı-tomalaq, as-naýqan kezinde suranys artady. О́nim О́skemendegi jeke turǵyn úıdiń irgesinen ashylǵan shaǵyn dúkende satylady. Áleýmettik jeli arqyly da tapsyrys qabyldaımyz», deıdi kásipker. Aıtqandaı, Toǵanastyń qurtyn Almatyǵa aldyratyn tutynýshylar da bar. Túp qııandaǵy aýyldy qalaı taýyp alǵan desek, burynǵy О́skemen turǵyny sábıiniń ish qurylysyna operasııa jasatypty. Keıin olar Almatyǵa kóshken. Alaıda aı saıyn dorba-dorba qurt alǵyzady eken. Nege desek, operasııa jasatqan kishkentaı qyzy Toǵanastyń qurtyn jep, densaýlyǵy túzelipti. Árıne, shaǵyn sehtan shyqqan qurttyń quramynda qospa joq, tabıǵı taza jolmen daıyndalady.
Merýert Toqyntaeva taza etten úsh túrli shujyq, qaqtalǵan qazy men qarta ázirleýdi de qolǵa almaq. Oǵan qajet apparat ta, shıkizat ta daıyn.
«Bir qıyndyq – jumysshy jaıy. 200 myń teńge jalaqyǵa eshkim kelmeıdi. Bizdiń qystaq pen Bozanbaı arasynda júrip-turýdy qıynsynady. Munda ne uıaly baılanys, ne ınternet joq. Keıde tapsyrys berýshilerim telefon shalyp izdeıdi. Bolashaqta osy máseleler oń sheshilse, sharýamyz qyza túser edi», dep máselesin de jasyrmady.
О́skemennen 50 shaqyrym jerdegi Toǵanasta qazir onshaqty ǵana tútin bar. Aýyl emes, Bozanbaıdyń kóshesi bolyp esepteledi eken. Mundaǵy jurt malmen jan baǵyp otyr. Merýertteı kásipkerler aýyldy tóńirekteı berse, tútin sany da artar ma edi.
Shyǵys Qazaqstan oblysy,
Ulan aýdany
