Sýret: kolesa.kz
Zaýyt qurylysy barysynda ınjener qurylysshylarymyz mol tájirıbe aldy. Jalpy, Qostanaı oblysyn mashına jasaý óndirisiniń ortalyǵyna aınaldyrǵymyz kelgen. Búgin sol maqsatymyzǵa jettik dep nyq senimmen aıtýǵa bolady.
Bıylǵy shildeden bastap zaýytta avtomobılder qurastyryla bastady, al búgin biz serııalyq óndiriske kóship otyrmyz. Jyl sońyna deıin keminde 3 myń, al kelesi jyly 30 myńǵa jýyq kólik shyǵarylady, onyń 20 myńy usaq torapty ádispen (CKD) óndiriledi. Bul zaýyt – zamanaýı avtomobıl jasaý tehnologııalaryn, atap aıtqanda, maksımaldy avtomattandyrý men sıfrlyq basqarýdy qoldanatyn álemdik deńgeıdegi joǵary tehnologııalyq óndiris orny sanalady.
Mashına jasaý salasyn damytý óńirdiń damýyna mýltıplıkatıvtik turǵydan áser etedi. Atap aıtqanda, mashına jasaý salasynda bir jumys ornyn qurý basqa salalarda bes-alty jumys ornynyń paıda bolýyna septigin tıgizedi. О́ndiristerdi lokalızasııalaý deńgeıin arttyrý úshin jańa zaýyttyń aınalasynda quramdas bólshek jetkizýshileri retinde shaǵyn jáne orta bıznes beldeýi qurylady.
«Kia» zaýytyn qajetti mamandarmen qamtamasyz etý maqsatynda óńirlik kolledjder men joǵary oqý oryndarynda mashına jasaýdyń 5 baǵyty boıynsha jańa mamandyqtar ashyldy. Olardyń ishinde mashına jasaý tehnologııasy, avtomattandyrý jáne basqarý, mashınalar men jabdyqtardy paıdalaný jáne tehnıkalyq qyzmet kórsetý, qara metall óńdeý, dánekerleý tárizdi mamandyq túrleri bar. Atalǵan mamandyqtardy ıgeretin stýdent-jastardyń bilim-tájirıbesin ushtaý maqsatynda óńirdegi birneshe oqý ornyna jan-jaqty materıaldyq-tehnıkalyq qoldaý kórsetildi.
Investorlar eń aldymen, óndiriske qolaıly ınfraqurylymnyń bar-joǵyna qaraıtyny belgili. Sondyqtan jobany oıdaǵydaı iske asyrý maqsatynda zaýytqa bólingen jer aýmaǵyn ınjenerlik-kommýnıkasııalyq ınfraqurylymmen qamtamasyz etý baǵytynda da aýqymdy jumys atqaryldy. Onyń syrtynda, jańa zaýytty qajetti shıkizatpen qamtamasyz etý, daıyn ónimdi úzdiksiz tasymaldaý maqsatynda uzyndyǵy 4,2 shaqyrym kireberis tas jol jáne tek zaýyt qajetine ǵana paıdalanylatyn 5 shaqyrymdyq temirjol toraby salyndy.
Qumar Aqsaqalov,
Qostanaı oblysynyń ákimi
