Aqtóbe oblysy Polısııa departamentiniń deregine qaraǵanda, quqyq buzýshylyqtardyń negizgi sebepteri – erli-zaıyptylardyń arasyndaǵy kelispeýshilikter, qyzǵanyshtan týǵan janjal jáne ishimdikke áýestenýshilik. Tirkelgen derekterge qaraǵanda, barlyq jaǵdaıda otbasynyń shyrqyn buzatyn er adamdar bolyp shyqty. Máselen, 14 qazanda Temir aýdanynyń 47 jastaǵy turǵyny túnde úıine iship kelip, janjal shyǵaryp, áıeli men balalarynyń ar-namysyna tıgen. Polısııa onyń bir jylda ekinshi ret otbasylyq janjalǵa sebepker bolǵanyn habarlaıdy. Osyǵan uqsas jaǵdaı Hromtaý aýdanynda da oryn aldy. 18 qazanda aýyl turǵyny úıine iship kelip, azamattyq nekedegi áıelin balaǵattap, úıiniń esigin syndyrǵan. Otbasynyń shyrqyn buzǵan eki er adam ákimshilik jaýapkershilikke tartylyp, olarǵa qoǵamdyq jumys túrinde jaza taǵaıyndaldy jáne polısııanyń profılaktıkalyq esebine alyndy.
«Otbasynda zorlyq-zombylyqqa, quqyqbuzýshylyqqa jol bergen adam jazasyn ótegennen keıin de polısııanyń baqylaýynda turady. Quqyqbuzýshyǵa arnaıy nusqaýlyq berilip, mindettelgen erejelerdi qatań saqtaý talap etiledi. Bul sharalar eń aldymen jábirlenýshiniń quqyǵyn qorǵaýǵa baǵyttalǵan», deıdi Aqtóbe oblysy Polısııa departamenti otbasylyq-turmystyq zorlyq-zombylyqqa qarsy kúres bóliminiń ınspektory Áıgerim Kórpeshova.
Bıylǵy jyldyń toǵyz aıynda PD otbasylyq- turmystyq janjaldardy týdyrýshylarǵa qarsy 3500-ge jýyq qorǵaý nusqaýlyǵyn ázirlegen. Quqyq qorǵaý organdary ótinishimen sot aqtóbelik 1 myń otbasylyq janjal týdyrýshyǵa arnaıy nusqaýlyqtar shyǵaryp, olardyń is-áreketin baqylaýdy aýmaqtyq polısııa ınspektorlaryna mindettedi. Inspektor olardy únemi baqylap turady. «Toǵyz aıdyń ishinde ýchaskelik polısııa ınspektorlary otbasylyq-turmystyq qorǵaý nusqamasyn buzǵan 270 adamdy, erekshe talaptardy buzǵan 438 agressordy anyqtap, olar ákimshilik jazaǵa tartyldy», deıdi polısııa aǵa leıtenanty Áıgerim Kórpeshova.
Polısııa departamentiniń deregine qaraǵanda, jyl basynan beri otbasylyq-turmystyq janjaldardan zardap shekken 57 áıel men 126 bala daǵdarys ortalyqtaryna ornalastyrylǵan. Munymen qatar, otbasylarǵa psıhologııalyq kómek kórsetý jumystary da qatar júrgizilip keledi. Máselen, bala-shaǵasynyń shyrqyn jıi buzatyn eki er adamǵa sot sheshimimen psıhologııalyq kómek kórsetildi. Bul jerde janjaldyń týý sebepteri anyqtalyp, otbasylyq kıkiljińdi boldyrmaýǵa keńester beriledi. О́kinishke qaraı, ishimdikke áýestenýshilik, jumyssyzdyq, erli-zaıyptylardyń bir-birimen til tabysa almaýy kıkiljińderdiń negizgi sebebine aınalyp otyr.
Aqtóbe oblysy
