Foto: Qyrmyzy Jumaǵalıqyzy
Búgin Astana qalasyndaǵy Astana Ballet teatrynda dástúrge aınalǵan «Mereıli otbasy – 2025» ulttyq baıqaýynyń jeńimpazdaryn marapattaý saltanaty ótti. Saltanatty jıynda Parlament Senatynyń Tóraǵasy Máýlen Áshimbaev jeńimpaz otbasylardy arnaıy quttyqtap, laýreattarǵa marapat tabys etti.
«Qazaq – qashanda otbasyn qasıetti uǵym sanaǵan halyq. Otbasynyń beriktigi men yntymaǵy – ulttyń birligi men turaqtylyǵynyń kepili. Sondyqtan ata-anany ardaqtaý, týystyq qatynastardy nyǵaıtý sııaqty qundylyqtar ult mádenıetiniń ózegine aınaldy. Qazirgi tańda Prezıdentimiz Qasym-Jomart Kemeluly Toqaevtyń tapsyrmasymen osy sabaqtastyqty ári qaraı saqtaý úshin aýqymdy jumys atqarylyp keledi. Bul rette otbasy ınstıtýtyn nyǵaıtýǵa, ana men balany qorǵaýǵa jáne qoǵamda durys qundylyqtar júıesin nasıhattaýǵa basa mán berilip otyr.Memleket basshysy bıylǵy Joldaýynda da otbasylardy qoldaýǵa, ana men balanyń quqyqtaryn qorǵaýǵa arnalǵan mańyzdy mindetter júktedi. Bul áleýmettik bastamalardyń bári elimizde otbasyqundylyqtarynyń nyǵaıýyna jáne azamattardyń ómir súrý sapasyn jaqsartýǵa yqpal etedi dep senemiz», dedi Máýlen Áshimbaev.
Sonymen qatar Senat Tóraǵasy óz sózinde ulttyń jańa sapasyn qalyptastyrýda otbasy ınstıtýtynyń mańyzdy rólin atap ótti. Onyń aıtýynsha, «Mereıli otbasy» jobasy – urpaqtar sabaqtastyǵyn saqtaý men ulttyq rýhty dáripteýdiń aıqyn alańy. Sondaı-aq «Ulttyq qor – balalarǵa», «Keleshek mektepteri» sııaqty jobalar qoǵamnyń bolashaǵyna baǵyttalǵan keshendi isterdiń biri ekenin de tilge tıek etti. Sondaı-aq, saltanatty keshte Máýlen Áshimbaev qatysýshylarǵa azamattyq jaýapkershiliktiń ozyq úlgisin kórsetip, adamgershilik jáne otbasylyq qundylyqtardy dáripteýge úlken úles qosqany úshin rızashylyq bildirdi.
«Mereıli otbasy – 2025» baıqaýynda elimizdiń túkpir-túkpirinen kelgen 20 otbasy jeńimpaz atandy. Olardyń qatarynda: Aqmola oblysynan kelgen shyǵarmashylyq otbasy – Mekebaevtar, Almaty oblysynan kelgen qolónershiler áýleti – Bekdaıyrlar, Aqtóbe oblysynan kelgen Tóremuratovtar, Abaı oblysynan Sydyqbaevtar bar. Respýblıkalyq mańyzy bar Astana, Almaty jáne Shymkent qalalarynyń jeńimpazdary sáıkesinshe,Aıtqojınder, Dúısebaevtar jáne Nurtaevtar otbasylary. Al, Batys Qazaqstan oblysynan Súıinǵarovtar otbasy úzdik dep tanyldy. Qaraǵandy oblysynyń úlgili otbasy bolyp kenshiler áýleti – Klıýchnıkovtar atandy. Soltústik Qazaqstannan mehanızatorlar otbasy – О́zbekovter, Atyraý oblysynan temirjolshylar otbasy – О́tepovter, Qostanaıdan jumysshylar otbasy – Egemberdıevter, Jambyldan temirjolshylar áýleti – Bektasovtar jeńimpaz dep tanyldy. Sonymen birge Jetisý oblysynan mádenı jáne sporttyq murany nasıhattaýǵa úles qosyp júrgen Bektenovter otbasy, Pavlodar oblysynan shahterler áýleti – Tursynbaevtar, Ulytaý oblysynan agrarshylar otbasy – Qapbasovtar, Qyzylorda oblysynan eńbek sińirgen jumysshylar otbasy – Ábsadyqovtar, Mańǵystaý oblysynan qoǵam qaıratkerleri jáne sharýalar áýleti – Sholtamanovtar, Túrkistan oblysynan agronomdar otbasy – Moldabekovter jáne Shyǵys Qazaqstan oblysynan ǵumyr jolyn tabıǵatty qorǵaýǵa arnaǵan Jaqypovtar otbasylary bar. Bul shańyraqtardyń barlyǵy óz óńirinde eńbegimen tanylǵan, ult rýhyn asqaqtatýǵa úles qosqan ónegeli áýletter.
Bıylǵy baıqaýda bas júldeni ıelengen Aqmola oblysynyń Mekebaevtar áýleti eńbegimen elge ónege, urpaq tárbıesinde ustazdyq joldy temirqazyq etken januıa.
«Munda bizdiń kelgen maqsatymyz – osy eńbegimizdiń nátıjesin kórý. Otbasymda toǵyz balam bar: bes ulym, tórt qyzym, bes kelinim, 30 nemerem jáne 3 shóberem bar. Bárimiz baqytty, baıandy ǵumyr keship kelemiz. Urpaqtarymnyń kóbi ustaz», deıdi áýlettiń aqsaqaly.
Onyń aıtýynsha, áýlettiń eń basty ereksheligi – ustazdyq rýh pen ulttyq qaǵıdany berik ustaný.
«Biz qazaq bolǵan soń qazaqsha sóılep, ádet-ǵurpymyzdy saqtaý – paryzymyz. Urpaǵymyzdy sanaly, danaly qazaq bolyp ósirýge bar kúshimizdi salamyz. Bul baıqaýǵa qatysý búkil januıamyzdyń ortaq sheshimi boldy. Ul-qyzdarymnyń altaýy – muǵalim. Kelinderim de joǵary sanattaǵy ustazdar. Al eń bastysy bárimiz tatý-tátti, birlikte ómir súrip jatyrmyz»,deıdi ol.
Mekebaevtar otbasy oblystyq kezeńde úmitkerlerdiń arasynan sýyrylyp shyǵyp, birlik pen bilimge degen adaldyqtyń arqasynda jeńimpaz atanǵan.
«Mereıli otbasy» ulttyq baıqaýy jyl saıyn el ishinde ónegeli ómir saltyn dáriptep, urpaq sabaqtastyǵyn nyǵaıtýǵa zor úles qosyp keledi. Osyndaı jobalar arqyly qoǵamda otbasy qundylyǵynyń máni artyp, ár shańyraqtyń jaýapkershiligi men yntymaǵy tereńdeı túsedi.
