Kúı kúmbirlegen kesh

Buǵan deıin daryndy kúıshiniń mundaı jeke keshi ótpegen eken. Qasıetti dombyranyń úni kúmbirlegen kúı keshine jurt­shylyq kóp jınaldy.

Qaırat Aıtbaev – Arqa kúıshilik mektebiniń ókili. Shertpe kúıdiń sheberi. Sondaı-aq ol – izdenimpaz zertteýshi. Táttimbet murasyn zerttep, aıtýly tulǵanyń biraz shyǵarmasyn notaǵa túsirgen. Sondyqtan búgingi keshin uly kúıshiniń mereıtoıyna tegin arnap otyrǵan joq.

Talantty ónerpaz jıylǵan qaýymǵa eń aldymen Táttimbettiń týyndylaryn usyndy. Onyń «Saryjaılaý», «Qyrmyzy Qosbasar», «Sylqyldaq» kúılerin naqyshyna keltirip oryndady. Uly kúıshiniń shyǵarmalary – názik syrǵa toly. Adamdy birden elitip áke­tedi. Jan-dúnıeńiz birese oıǵa, birese muńǵa batady. Keıde kóz aldyńyzǵa kók shal­ǵyny jaıqalǵan jaılaý keledi. Tipti keshki ymyrt­taǵy dalanyń áýezdi áýenin tyńdaǵan­daı­syz. Alystan tul­parlar tuıaǵynyń ­dúbiri estilgendeı bolady. Kesh ıesi Ábiken Hasenov­tiń «Qońyry» men Tólegen Mombe­kovtiń «Saltanatyn» tart­qanda da ­osyndaı sezimdi bas­tan keshtik. Sonymen ­qatar Nurǵısa Tilen­dıev­tiń sırek ­oryndalatyn «Kókshe­taý» shyǵarmasyn kúmbirletti. Buǵan qosa, basqa da kórnekti kúıshilerdiń týyn­dylaryn tartý etti. Jalpy, Qaırat kúıdi babyna keltirip tartady. Tyń­dar­­mandy kúı sazyna jipsiz baılap qoıady.

Kesh barysynda kúımen birge ásem án aıtylyp, jyr oqyldy. Aıta­lyq, belgili kúıshi Janǵalı Júz­baı, dástúrli ánshi Serjan Musaıyn, termeshi Kúnsulý Túrikpen, kúıshi Nurmuhamet Jaqanov jáne halyqaralyq, respýblıkalyq baı­qaý­lardyń laýreattary Venera Tabys, Aıdos Sanııazbekuly, Murat Sultanbaı, Álıhan Moldabekuly, Aıtolqyn Toqtaǵan óner kórsetip, kórermen rızashylyǵyna bólendi. Jas aqyndar Tólegen Mellat pen Tileýbek Batys dúrkiretip jyr oqydy. Keshti aqyn, Jazýshylar odaǵynyń múshesi Umtyl Zaryqqan aıaqqa quıǵan astaı jınaqy júrgizip, kesh ıesiniń bolmysyn kesteli jyrmen órnektep otyrdy.

Mádenı shara sońynda belgili memleket jáne qoǵam qaıratkeri Dúısen Qaseıinov sóz alyp, osydan eki jyl bu­ryn Túrkııada Táttimbet atamyzǵa es­kertkish qoıylǵanyn aıtyp, uly tulǵaǵa arnap keremet kúı keshin arnaǵan Qaırat Aıtbaevqa jyly lebizin bildirdi.