Foto: Ashyq derekkóz
#RepublicDay, #Respýblıkakúni heshtegterimen jarııalanǵan beınerolıkter eldiń san túrli óńirin, mádenıet pen ónerin, jastardyń kreatıvti oılaýyn biriktiretin alańǵa aınaldy. Biri beınerolık arqyly kók týdyń tarıhyn baıandasa, endi biri ulttyq kıim kıip bı bıleıdi, úshinshisi – elimizdiń jetistikterin ınfografıka túrinde kórsetedi. Oǵan qosa, mektep oqýshylary men stýdentter túrli chellendjder uıymdastyryp, óz elin maqtan etýdiń zamanaýı úlgisin qalyptastyryp keledi.
Sońǵy jyldary jastar arasynda tanymal bolǵan « Meniń elim – meniń týym!» chellendji áleýmettik jelilerde erekshe qarqyn aldy. Qatysýshylar úıleriniń balkondaryna memlekettik týdy ilip, foto men vıdeolar jarııalady.
Al TikTok-ta taraǵan «Men Qazaqstannyń azamatymyn» fleshmoby da keńinen tanyldy. Onda jastar ulttyq kıimmen eldiń basty rámizderin ustap, patrıottyq ánderge beıne túsiredi. Olardyń qaralymy mıllıonnan asyp, bul chellendj vırtýaldy keńistiktegi eń iri otansúıgish aksııalardyń birine aınalyp úlgerdi. Sıfrlyq dáýirdegi mundaı jobalardy elge degen súıispenshiliktiń jańa formaty desek te bolady.
Máselen, elordada ótken «Respýblıka rýhy – jastyq jalynynda» atty fleshmobta 1500-den astam stýdent el rámizderimen alańǵa jınalyp, bir mezette «Atameken» ánin shyrqady. Mereke tek qala ortalyqtarynda emes, shalǵaıdaǵy aýyldarda da erekshe atap ótilip jatyr. Aýyl jastary túsirgen beınerolıkterin #MenińTýym, #RepublicDay2025 heshtegimen bólisip, eldik sezimin jelide dáriptep júr.
Al kitaphanalar men mádenıet úıleri jastardyń ıdeıasyna qoldaý kórsetip, túrli shyǵarmashylyq baıqaýlar uıymdastyryp otyr. Jas blogerler men volonterler de bul úrdisten tys qalǵan joq. Bıylǵy merekeniń taǵy bir ereksheligi tárbıeshiler búldirshinderge Tý men Eltańbanyń maǵynasyn sýret pen oıyn arqyly jetkizip, balaqaılar da chellendjderge óz úlesin qosyp otyr. Tipti keı balabaqshalarda balalar óz qolymen tý jasap, ánuran shyrqaǵan beıneler áleýmettik jelide taraldy.
Osyndaı bastamalar qoǵamda rýhty kúsheıtip, egemendiktiń qadirin uǵynýǵa jol ashady. Ásirese TikTok pen Instagram arqyly taraǵan patrıottyq chellendjder búginde shekara asyp, ózge eldegi qandastardyń da qyzyǵýshylyǵyn oıatyp otyr. Bul Respýblıka kúniniń sıfrlyq dáýirde jańa tynys alǵanynyń aıqyn dáleli.
