Festıval zamanaýı qýyrshaq teatrynyń san alýan qyryn kórsetken, mádenıet pen ónerdi toǵystyrǵan erekshe alań boldy. Bıylǵy óner dýmanyna Italııa, Ispanııa, Iran, Úndistan, Reseı, Bolgarııa, Túrkııa, Ázirbaıjan, О́zbekstan, Qyrǵyzstan jáne Qazaqstannan kelgen on bes teatr ujymy men júz elýge jýyq kásibı qýyrshaq sheberi qatysyp, kórermen qaýymdy túrli stıldegi qoıylymdarymen tánti etti.
Festıval barysynda úzdik qatysýshylarǵa qarjylaı júldeler men arnaıy nomınasııalar tabystaldy. Barlyq ujymdarǵa dıplomdar men estelik syılyqtar úlestirilip, eńbekteri joǵary baǵalandy.
Qoıylymdarmen qatar, qýyrshaq teatrynyń teorııasy men tájirıbesi toǵysqan sheberlik sabaqtary men dárister uıymdastyryldy. «Qýyrshaq teatrynyń óner tarıhyndaǵy orny», «Qýyrshaq sheberleriniń qol energııasy», «XXI ǵasyrdaǵy qýyrshaq teatrynyń jańa keńistikteri» sekildi ózekti taqyryptardy qamtyǵan bul kezdesýler halyqaralyq mamandar úshin kásibı ósý men ózara tájirıbe almasýdyń tıimdi alańyna aınaldy.
Memlekettik qýyrshaq teatrynyń dırektory Almat Amangeldi qýyrshaq teatrynyń jemisi jetistigine toqtaldy:
«Bes kún boıy qýyrshaq teatrynyń álemi jańa boıaýlarǵa, jańa esimderge jáne jańa ıdeıalarǵa toly boldy. Kórermender men qatysýshylar túrli eldiń mádenıetin jaqynnan tanyp, bir sahnada toǵysqan shyǵarmashylyq qýatty sezindi. Bul festıvaldiń shynaıy tabysy – barsha áriptesterdiń eńbeginiń jemisi. Keleshekte de osyndaı ıgi bastamalar jalǵasyn taýyp, qýyrshaq teatrynyń óneri órleı bersin», dedi.
Aıta ketý kerek, Qazaqstan Respýblıkasynyń Memlekettik qýyrshaq teatry bıyl 90 jyldyq mereıtoıyn atap ótti. Temirbek Júrgenovtiń bastamasymen 1935 jyly qurylǵan bul teatr – elimizdegi qýyrshaq óneriniń qara shańyraǵy sanalady. Toqsan jyldyq tarıhynda ol birneshe býyn kórermenniń júreginen oryn alyp, ult mádenıetiniń altyn qoryna endi.
