Aqtóbe oblysynyń kóptegen aýyldaryna gaz jetkiziledi

AQTО́BE. 19 aqpan. Aqtóbede 2017 jylǵa deıin Áıteke bı, Oıyl jáne Yrǵyz aýdandarynyń ortalyqtary gaz qubyryna qosylatyn bolady. Bul týraly oblystyq «Aqtóbe « gazeti habarlady. Osy óńirlerdegi 17 myń turǵyn arzan tabıǵı otyndy paıdalaný múmkindigine ıe bolmaq. Jergilikti ilespe gaz taǵy da 20 myńnan astam turǵyny bar 30 eldi mekenniń ıgiligine aınalady dep kútilýde. Osy kezeńde óńirde 17 jobany júzege asyryp, gaz bólý jelilerin qurylymdaý qarastyrylýda. Buǵan 20 mıllıard teńge shamasyndaǵy qarjy jumsalatyn bolady. Aqtóbe aglomerasııasyn damytý jáne turǵyn úı-kommýnaldyq sharýashylyq ınfraqurylymdaryn jańǵyrtý boıynsha Elbasy tapsyrmasyna sáıkes Aqtóbe oblysynyń ákimshiligi «QazMunaıGaz» UK» AQ jáne «QazTransGaz» AQ arasynda uzaq merzimdi jáne ózara tıimdi yntymaqtastyq týraly memorandýmyna qol qoıyldy. Kelisimge sáıkes oblysta úsh avtomattandyrylǵan gaz bólý stansasynyń qurylysy qarastyrylyp, gaz bólý júıesin jańǵyrtý kózdelýde. Sondaı-aq, jeke sektordaǵy turǵyn úıler ýchaskesine deıin aýylishilik gaz jelilerin júrgizetin gaz qubyry-burý jelisi qurylysy qolǵa alynady. Oblys ákimi Arhımed Muhambetovtyń aıtýynsha, brinshi kezekte Aqtóbe, sondaı-aq, Alǵa, Qandyaǵash qalalarynda avtomattandyrylǵan gaz bólý stansalary salynatyn bolady. Oblys basshysy, sondaı-aq aglomerasııa quramyna enetin Alǵa aýdanyndaǵy Bogoslovka, Qarǵaly aýdanyndaǵy Qosestek, Hromtaý aýdanyndaǵy Aqqudyq, Muǵaljar aýdanyndaǵy Altyndy, Taldysaı, Eńbek selolaryna gaz jetkiziletinin aıtty. Sondaı-aq, osyndaı sharalardyń nátıjesinde oblysty ıntensıvti ındýstrıaldy damytý, Aqtóbe qalasyn aglomerasııalyq prosester ortalyǵy retinde qurylymdaý, keń aýqymda qurylys jumystaryn júrgizý, shaǵyn jáne orta bıznesti damytý múmkindikteri ashyla túspekshi. Satybaldy Sáýirbaı. Derek: «Aqtóbe « gazeti. Sýret: thenews.kz.