Soltústik Qazaqstan oblysynyń ár aýdanynan kelgen 18 komanda órt sóndirý isindegi shapshańdyq pen birliktiń, fızıkalyq daıyndyq pen rýhtyń synǵa túser sátinde baq synady. Birinshi kezeńniń qorytyndysy boıynsha «Eń úzdik gaztútinnen qorǵaýshy» ataǵyn Smırnovo aýylynyń №9 órt sóndirý bóliminiń qaraýyl bastyǵy, azamattyq qorǵaý kapıtany Elaman Baıtýhanov jeńip aldy. Ol 18 qabatty bar bolǵany 2 mınýt 11 sekýndta baǵyndyryp, erik-jigeri men kásibı daıyndyqtyń joǵary deńgeıin kórsetti. Al «Qaýipsizdik beketindegi eń úzdik beketshi» bolyp Petropavl qalasynyń №5 órt sóndirý bóliminiń órt sóndirýshi-qutqarýshysy, azamattyq qorǵaýdyń kishi serjanty Kamıl Mansýrov tanyldy.
Komandalyq esep boıynsha:
1-oryn – Aqjar aýdanynyń №8 órt sóndirý bólimi,
2-oryn – Petropavl qalasynyń №3 órt sóndirý bólimi,
3-oryn – Petropavl qalasynyń №2 mamandandyrylǵan órt sóndirý bólimi ıelendi.
Jarys sońynda jeńimpazdarǵa gramotalar men baǵaly syılyqtar tabys etildi.
Aıta keteıik, bıyl Qazaqstan Respýblıkasynyń Tótenshe jaǵdaılar mınıstrligine 30 jyl tolyp otyr. Úsh onjyldyq ishinde azamattyq qorǵaý salasynyń mamandary san ret adam ómirin arashalap, óz isterine degen adaldyqtyń aıqyn úlgisin kórsetti. Búgingi jeńimpazdar — sol dástúrdiń laıyqty jalǵasy. Olar úshin bul tek jarys emes, mamandyqqa degen súıispenshiliktiń, el aldyndaǵy boryshtyń kórinisi.
Sevara Zııahan
