Saltanatty keshke Mádenıet jáne aqparat mınıstri Aıda Balaeva qatysty.
Mınıstr Memleket basshysy Qasym-Jomart Toqaevtyń quttyqtaýyn jetkizdi.
Prezıdent quttyqtaýynda ánshini otandyq ónerdiń eń jarqyn ókilderiniń biri, erekshe daýys ıesi retinde atap ótti.
«Siz áıgili otandyq jáne álemdik operalyq týyndylar men lırıkalyq ánderdi sheber oryndap, kórermenniń ystyq yqylasyna bólenip júrsiz. Erekshe tabıǵı darynyńyz jáne tynymsyz eńbegińiz arqyly elimizdiń mádenı-rýhanı baılyǵynyń órisin keńeıtýge qosqan úlesińiz óte mol. Kemel bilimińiz ben boıyńyzdaǵy asyl qasıetterińizben zamandastaryńyzdyń ortasynda syı-qurmetke bólenip júrsiz», delingen Memleket basshysynyń quttyqtaý hatynda.
Iá, talantty adamdardy ózgelerden daralap turatyn ózindik ereksheligi bolady. Qazaqstannyń eńbek sińirgen qaıratkeri, ánshi, professor Tolqyn Zabırovanyń da án áleminde ózindik qoltańbasy bar. Ol – elimizdiń úlken sahnalaryna estrada men opera janrynyń kollaborasııasyn alyp shyqqan alǵashqy ánshi. О́ner ıesiniń oryndaýyndaǵy «Egiz lebiz», «О́mirge ǵashyqpyn», «Qara maǵan», «Máńgilik mahabbat», «Sen úshin», «Saǵyndym seni» syndy ánderi áli kúnge deıin kórermenniń qulaǵynda.
Qazaqtyń bulbul ánshisi, QSRO halyq ártisi Bıbigúl Tólegenovadan kásibı tálim alyp, úlken sahnalardy baǵyndyrǵan ánshiniń týma talanty qaı kezde de ishki tereńdik hám bıik talǵammen daralanady. Onyń erekshe daýysy Shyǵys náziktigi men dala úniniń daralyǵyn bir arnada toǵystyryp, ár áni júrekterge sheksiz mahabbat pen rýhanı kemeldikti pash etetindeı. Ánshiniń oryndaýyndaǵy týyndylarda ómirge, mahabbatqa, týǵan jerge, adamgershilik pen rýhanı tazalyqqa degen súıispenshilik aıqyn kórinis tabady. Bir sózben aıtqanda, Tolqyn Zabırova – qazaq mýzyka mádenıeti úshin kópqyrly tulǵa. Ol ónerde, sahnada ǵana emes, ǵylymı-pedagogıkalyq salada da tabysty qyzmet etip keledi. Onyń daýysy men án stıli halyqtyq dástúrmen, klassıkalyq vokaldyq tásildermen ári zamanaýı estradamen sheber úndesedi. Sonymen qatar ol – jas talanttardy qoldaý arqyly óner áleminde ózin ustaz retinde dáleldegen dara daryn ıesi. Bul ánshiniń kásibı biliktiligin ári keńeıtip, ári nyǵaıtady.
«Kóziniń tirisinde anam osy konsertti kórýdi armandady. Biraq, ókinishke qaraı, bul kúnge jete almady. Búgin anamnyń armany oryndalǵan kún. Anama degen mahabbat máńgilik júregimde ómir súredi. Bıigine qondyrsa da, aıazyna tońdyrsa da, men ómirge ǵashyqpyn! О́mirdiń máni – mahabbat! Júrektiń áni – mahabbat! Al men sheksiz mahabbatty anamnyń meıiriminen sińirdim. Sol shýaqty búgin sizderge arnaımyn», dep aǵynan aqtarylyp, sahnada jan syrymen bólisken ánshi Astana tórinde ótken keremet keshinde el qulaǵynda jattalǵan eski ándermen qatar, janǵa jaǵyp, júrekke jetken jańa týyndylaryn da tartý etti. Osylaısha, óner ıesi tyńdarmanyn sahnadaǵy 35 jyldyq mereıli belesiniń qundylyǵyna boılatty.
2024 jyly Tolqyn Zabırova «Parasat» ordenimen marapattaldy.
