Kollaj: Kazpravda.kz / Adılbek Taýekelov
Jarystyń 122 jyldyq tarıhy bar. KSRO dáýirinde bul sport túrinen Nellı Kım jasyndaı jarqyldady. Shymkentte bilikti bapker Vladımır Baıdınnen tálim-tárbıe alǵan sportshy 1974–1979 jyldar aralyǵynda uıymdastyrylǵan álem chempıonattarynda 5 altyn, 4 kúmis, 2 qola medal ıelendi. Olımpııa oıyndarynyń jeńimpazy Iýrıı Sapenkonyń qol astynda jattyqqan Natalıa Ilenko 1981, 1985 jyldary erkin jattyǵýda aldyna jan salmady. Edige Jarovtyń shákirti Valerıı Lıýkın 1987 jyly bas júldeni oljalasa, 1991 jyly altyn men kúmisti qanjyǵasyna baılady. Sol kezderi Vladımır Novıkov eki dúrkin álem chempıony atandy. Odan bólek, joǵaryda esimderi atalǵan jerlesterimiz Olımpııa oıyndarynan bastap, basqa da asa iri halyqaralyq jarystarda mol oljaǵa keneldi.
1993 jyldan beri elimizdiń gımnastary jarystarǵa jeke komanda retinde qatysa bastady. 1997 jyly Shveısarııanyń Lozanna qalasynda Sergeı Fedorchenko qoldy tirep jasalatyn jattyǵýda aldyna jan salmaı, altyn tuǵyrǵa kóterildi. Sodan keıin sportshylarymyz túrli jaýapty jarystarda jaqsy nátıje kórsetkenimen, álem chempıonattarynda kópke deıin joldary bolmady. Tek 2023 jyly Belgııanyń Antverpeninde Mılad Karımıdiń qanjyǵasy maılanyp, kerme jattyǵýynda qola medaldy enshiledi.
Elimiz qurama komandasynyń bapkerleri Djakartadaǵy jarysta Olımpııa oıyndarynyń kúmis júldegeri Narıman Qurbanov pen Mılad Karımıge zor senim artyp otyr. Sondaı-aq Dmıtrıı Patanın, Ilıas Ázızov, Dıas Toıshybek, Zeınolla Ydyrysov óner kórsetedi. Chempıonat 25 qazanda aıaqtalady.
