Sýretti túsirgen – Erlan OMAR, «EQ»
Táýelsizdik tańy atar aldynda jaryq kórgen qos basylym kóp keshikpeı-aq elimizdiń aqparat keńistiginen oıyp otyryp óz oryndaryn aldy. Keńestik solaqaı saıasattyń kesirinen ult upaıy túgendelmeı turǵan Selınograd qalasynda qazaqtyń qalǵyp ketken sanasyn qaıta oıatý, árıne ońaı emes edi. «Aqmola aqıqatynyń» (gazet áý basta osylaı atalǵan) elin súıgen elgezek jýrnalısteri bul mindetti oıdaǵydaı oryndady.
Al Qazaqstan egemendikke qol jetkizip, Aqmola astanaǵa aınalǵan shalqymaly-tolqymaly shaqtarda egiz qozydaı eki únjarııa eńsesin túzep, eldik máselelerdi eksheı bildi. Alashtyń altyn alqasyndaı arý Astananyń mereıin ósirip, mártebesin bıiktetýge qomaqty úles qosty. Baǵanaly basty ordamyzdyń qalyptasý, damý, órkendeý kezeńderi týraly derekter men dáıekterdi astanalyq áriptesterimizdiń ár jyldary jazǵan máıekti maqalalarynan molynan tabýǵa bolady. Elorda epopeıasy áli jazylyp jatyr...
Mereıtoılyq saltanatta Memlekettik keńesshi Erlan Qarınniń, Prezıdent kómekshisi-baspasóz hatshysy Rýslan Jeldibaıdyń, Mádenıet jáne aqparat mınıstri Aıda Balaevanyń, Astana ákimi Jeńis Qasymbektiń quttyqtaý hattary oqyldy.
Mádenıet jáne aqparat vıse-mınıstri Aızada Qurmanova torqaly toıdyń joralǵysyn jasap, «Astana aqshamy» men «Vechernıaıa Astananyń» Ǵalym Qojabek, Aıgúl Ýaısova, Shynar Jaqypova, Vasılıı Kras, Iýlııa Mendeskaıa, Maksım Ýdod sekildi mańdaıaldy qyzmetkerlerine túrli marapat belgilerin tapsyrdy.
Áserli kesh Qazaqstannyń halyq ártisi Aıgúl Qosanova bastaǵan, Qaırat Baekenov, Marjan Arapbaeva, Qurmash Mahanov, О́zgeris Sherikbaı, Rýhııa Baıdúkenova jáne basqa sahna sańlaqtary qostaǵan ádemi án-bımen ádiptelip, kópshilik kóńilin kónshitti.
Eń bastysy, eki gazettiń elorda endikteri men boılyqtaryndaǵy eńký-eńký joldary erekshe dekorasııalarmen aıshyqtalyp, kórkem beınekórinister arqyly berilgenin atap ótkenimiz jón.
Mereıtoılyq keshte sondaı-aq elordalyq fototilshiler Sultan Seıit, Vasılıı Kras, Ońalhan О́nerhannyń sýretterinen qurastyrylǵan «Obektıvte – Astana aıshyqtary» atty kórme uıymdastyryldy. Kórmeniń ashylýynda sóz sóılegen Senat depýtaty (gazettiń 2006–2008 jyldardaǵy bas redaktory) Nurtóre Júsip pen Astana qalalyq máslıhatynyń tóraǵasy Tabıǵat Zeınulqabden qarasy qalyń oqyrman qaýym men qýanysh qushaǵyndaǵy ujym múshelerine jyly lebizin aıtyp, tolaǵaı tabys tiledi.
Mereıtoılyq is-sharaǵa qos basylymnyń ár jyldardaǵy bas redaktorlary men ardagerleri, zııaly qaýym ókilderi qatysty.
P.S. Kóziqaraqty kópshilik «Astana aqshamy» elordalyq mártebe alǵan tusta belgili jýrnalıst, BAQ salasy boıynsha Prezıdent grantynyń laýreaty, Qazaqstannyń eńbek sińirgen qaıratkeri Jumagúl Berdenqyzy Saýhat basqarǵanyn biledi. Ol sondaı-aq, elordalyq «Astana» jýrnalynyń negizin qalaǵan edi. Basylymnyń mereıtoılyq baǵdarlamasy aıasynda marqumnyń turǵan úıine memorıaldyq taqta qoıylsa, Astananyń eki birdeı basylymyna bas redaktorlyq etken aıaýly apamyzdyń rýhyna baǵyshtalǵan saýapty istiń biri bolary talas týdyrmasa kerek.
