«Biz ulttyq ekonomıkany túbegeıli jańǵyrtý úshin ártaraptandyrýǵa basa mán berip otyrmyz. Ásirese, kólik-tasymal salasyn strategııalyq mańyzdy baǵyt retinde damytyp jatyrmyz. Qazaqstan Eýrazııanyń basty logıstıka ortalyǵy, ıaǵnı haby bolýy kerek. Oǵan elimizdiń áleýeti jetedi, múmkindigimiz de mol. О́tken aıda «Dostyq – Moıynty» temirjolynyń ekinshi jelisi iske qosyldy. Bul – egemendik kezeńinde salynǵan eń iri temirjol qurylysy», dedi Memleket basshysy.
Sondaı-aq Prezıdent bıyl 13 myń shaqyrym avtokólik joly salynyp, jóndelgenin aıtty.
«Qytaı arqyly aýqymdy júk tasymaldaý múmkindigine ıe boldyq. Qazirgi halyqaralyq naryqtaǵy turaqsyz ahýaldy eskersek, muny úlken jetistik dep aıtýǵa bolady. Áýe qatynasy salasyndaǵy tabystarymyz da az emes. Bıyl 36 jańa áýe reısi ashyldy, olardyń ishinde Azııa men Eýropanyń iri qalalary bar. Biraq bul júıeni odan ári damytýymyz kerek. Onyń ústine áýe joldary arqyly júk tasymaldaý júıesin de (kargo) nyǵaıtýymyz qajet. Elimizde óndiris te damyp keledi. Bul salanyń ósimi jyl basynan beri 7,5 paıyzǵa jetti. Shaǵyn jáne orta bıznestiń ekonomıkadaǵy úlesi 40 paıyzǵa jaqyndady. Kásipkerler elimizdegi eńbekke qabiletti azamattardyń jartysyna jýyǵyn jumyspen qamtyp otyr. Qurylys salasy qarqyndy damyp jatyr. Byltyr Qazaqstanda 19 mıllıon sharshy metrge jýyq turǵyn úı salyndy. Bul – Táýelsizdik jyldaryndaǵy eń joǵary kórsetkish, nátıjesinde myńdaǵan otbasy baspanaly boldy. Aýyl sharýashylyǵy salasyndaǵy jalpy ónim kólemi 2,5 ese ósti. Bıyl da qambamyz astyqqa toldy, 20 mıllıon tonnadan astam bıdaı jınaldy. Qazaqstannyń eksporttyq áleýeti artýda, saýda seriktesi retindegi bedeli nyǵaıýda», dep atap ótti el Prezıdenti.
