«Qazaqstanymyz Ádiletti, Qaýipsiz, Taza, Kúshti el bolýy kerek. Bul – jalpyulttyq strategııalyq maqsatymyz, barsha azamatqa ortaq mindet, qasterli paryz. Ozyq el bolý úshin biz áli talaı belesti baǵyndyrýymyz kerek.Turaqtylyq pen tynyshtyqtyń qadirin bilý qajet. Ásirese, muny jastarymyzǵa durys túsindirip, olarǵa baǵdar kórsetken jón. Elimizdiń erteńi – óskeleń urpaqtyń qolynda. Sondyqtan jastarymyzdy eń aldymen Adal azamat etip tárbıeleý qajet.
Adal azamat degenimiz – elin, jerin syılaıtyn, zańǵa baǵynatyn, bilimge umtylatyn, ulttyq qundylyqtardy qoldaıtyn jáne el birligin nyǵaıtýǵa úles qosatyn azamat», dedi Memleket basshysy.
Prezıdenttiń aıtýynsha, elimizdiń ozyq bolýy osyndaı otanshyl, tártipti, bilimdi, mádenıetti, belsendi jáne oıy ushqyr jastarǵa tikeleı baılanysty. О́z qabiletine senetin, kózi ashyq, kókiregi oıaý, eti tiri, eńbekqor adamnyń eshkimge táýeldi bolmaıtynyn jas urpaq uǵynyp ósýi qajet. Ár azamatymyz óz isine tııanaqty, uqypty jáne jınaqy bolsa, tutas memleket te tabysty bolmaq.
«Biz básekege qabiletti ult bolýymyz kerek. Bul – eń aldymen, ultymyzdyń sapasy, ıaǵnı azamattarymyz zamanaýı, ozyq oıly, jasampaz bolýy qajet degen sóz. Qazirgi asa kúrdeli, qubylmaly jáne qarama-qaıshylyqqa toly zamanda ozyq el bolý ońaı sharýa emes. Sol sebepti biz batyl sheshimder qabyldap, nyq senimmen jarqyn bolashaqqa qaraı júremiz. Sonda ǵana osy ýaqyt halqymyzdyń sana-seziminde uly betburys jasaǵan tarıhı kezeń bolyp qalary anyq. Men buǵan kámil senemin», dedi Q.Toqaev.
