NOMAD akademııasynyń dırektory Rýslan Jetýbaev bolashaqta Prezıdenttik kýbokty dástúrli týrnırge aınaldyrý kózdelip otyrǵanyn aıtty:
«Bul týrnır Qazaqstannyń brendine aınalyp, jyl saıyn jas talanttar men tanymal sheberler bas qosatyn alań bolǵanyn qalaımyz. Bul jaı ǵana jarys emes – ústel tennısin damytý men halyqaralyq sporttyq yntymaqtastyqty nyǵaıtýǵa jasalǵan qadam», dedi ol.
Bıylǵy dodaǵa 14 elden 300-den astam sportshy qatysady. Olardyń qatarynda Qazaqstannyń Astana, Almaty, Shymkent, Qaraǵandy qalalarynan kelgen sportshylarmen birge Ońtústik Koreıa, Qytaı, Vengrııa, Mysyr, Malaızııa, Iran, Saýd Arabııasy jáne ózge memleketterdiń tennısshileri bar. Týrnırdiń júlde qory – 115 myń AQSh dollary.
Aıtýly is-sharaǵa ITTF álemdik reıtınginiń top-100 sportshylarynyń qatysýy onyń halyqaralyq mártebesin aıqyndaı túsedi.
Koreıalyq sport ańyzy Joo Sae-hyuk uıymdastyrýshylarǵa alǵysyn bildirip, Qazaqstanda ústel tennısin damytýǵa nıetti ekenin jetkizdi:
«Munda bolyp, osyndaı aýqymdy sharanyń bir bóligi bolǵanyma qýanyshtymyn. 2027 jyly Qazaqstan jańa, jeńisti deńgeıge shyǵady dep senemin. Men bar kúshimdi salyp kómektesemin – kelip turamyn, qatysamyn jáne elderińizde ústel tennısiniń damýyn qoldaımyn».
Kýboktyń basty tartystarynyń biri – álemdik juldyzdardyń qatysýymen ótetin shoý-match bolmaq. Oǵan Qytaıdyń áıgili tennısshileri Sıýı Sın (álemniń eks-birinshi raketkasy), Fan Bo (álem chempıonatynyń kúmis júldegeri), Avstrııanyń 2003 jylǵy álem chempıony Verner Shlager, sondaı-aq Koreıanyń áıgili oıynshysy Djý Se Hýk qatysady.
Týrızm jáne sport vıse-mınıstri Serik Maratuly Jarasbaev týrnırdiń el sporty úshin mańyzdylyǵyn atap ótti:
«2027 jyly Qazaqstan ústel tennısinen álem chempıonatyn qabyldaıdy. Sondyqtan mundaı deńgeıdegi jarysty ótkizý – úlken mártebe. Bul is-shara álemdik dodaǵa daıyndyq retinde uıymdastyrylyp otyr. Jarysqa sheteldik myqty sportshylar keledi dep josparlanǵan. Solardyń oıynyn tamashalaǵan jas jetkinshekterimiz mol tájirıbe jınaıdy. Osy týrnır arqyly el úzdikterin jáne ústel tennısiniń rezervin baıqaýǵa bolady», dedi ol.
Prezıdenttik kýbok – elimizdiń sporttaǵy bedelin arttyryp, elordamyzdy halyqaralyq ústel tennısi kartasyna engizetin mańyzdy qadam bolmaq.
