Maıdangerler marapattaldy

Shyǵys óńirinde birqatar ardager memlekettik nagradalarmen marapattaldy. Aımaq basshysy Danıal Ahmetov Uly Otan soǵysynyń ardagerleri men olarǵa teńestirilgen tulǵalarǵa jáne maıdanda mert bolǵandardyń rýhyn jańǵyrtý jumystaryna úles qosqan ardagerlik uıymdardyń múshelerine saltanatty túrde memlekettik nagradalardy tapsyrdy. Atap aıtqanda, Georgıı Gýdkov, Konstan­tın Gýslev, Salyq  Sabılıanov,  Grıgorıı Severýshenkov, Toqtaǵazy Tileýbaev, Ana­to­lıı Korotkov esimdi soǵys jáne eńbek ardagerleri «Qurmet» ordenimen marapat­taldy. Olardyń beseýi Lenıngradty, Be­lorýssııany, Kýrsk doǵasyn jáne Japonııany azat etýge qatysqan maıdangerler bolsa, Anatolıı Korotkov Lenınogorsk kombınatynda 38 jyl eńbek etken tyl ardageri. Sondaı-aq, Japonııany azat etý urystaryna qatysqan soǵys ardageri Eleýsiz Qıynbaev jáne tyl ardagerleri Klavdııa Gavrılko men Marııa Kolmakova «Eren eńbegi úshin» medalimen, Maıra Baǵdatova, Tóken Bulqanov jáne memlekettik qyzmetke shırek ǵasyr ǵumyryn arnaǵan Tóleýhan Ábilqasymov Qazaqstan Respýblıkasynyń Qurmet gramotasymen marapattaldy. – Ardagerler – elimizdiń maqtanyshy. Erlikterińiz ben el úshin etken eńbekterińiz – bolashaqqa qadam basqan jas urpaqqa úlgi-ónege. Keleshek býyn sizder jazǵan erlik pen eńbek shejiresinen zor taǵylym alady, – dedi D.Ahmetov. Sondaı-aq, óńir basshysy soǵys arda­gerleri Janaq Turǵymbaev pen Vıacheslav Mamaevtyń shańyraǵynda bolyp, qarııa­lardy Jeńis kúnimen quttyqtady. Jalpy, Uly Otan soǵysy jyldary Shyǵys Qazaqstannan maıdan dalasyna 170 myń adam attanyp, onyń 96 myńy týǵan jerine oralmaǵan eken. Shyǵysqazaqstandyq 109 jaýynger men ofıser Keńes Odaǵynyń Batyry ataǵyna ıe bolsa, 22 jaýynger eń joǵary sarbaz nagradasy – «Dańq» ordeniniń tolyq kavaleri ataǵyna ıe. Sondaı-aq, oblystyń 9 myń tyl ardageri «Uly Otan soǵysyndaǵy eren eńbegi úshin» medalimen marapattalǵan. Búginde óńirde 579 Uly Otan soǵysynyń ardageri men 27 468 tyl ardageri bar. Shyǵysqazaqstandyq ardagerlerge bıýdjet kózderinen 500 myń teńge kóleminde bir mezettik aqshalaı tólem tabys etildi. Sonymen qatar, oblystyq bıýdjet esebinen shıpajaılar men demalys oryndaryna tegin joldama berildi. Dýman ANASh, «Egemen Qazaqstan». О́SKEMEN.