Foto: Ashyq derekkóz
Aqtóbe oblystyq densaýlyq saqtaý basqarmasynyń málimetinshe, zardap shekken alty adam oblys ortalyǵyndaǵy medısınalyq mekemelerge jetkizilgen. Kámeletke tolmaǵan naýqastyń jaǵdaıy asa aýyr dep baǵalanǵan. Ol kóp jaraqat alǵan jáne qazirgi tańda oblystyq kópsalaly balalar aýrýhanasynyń jansaqtaý bóliminde jatyr.
«Jasóspirimniń jaǵdaıyn elimizdiń bas balalar neırohırýrginiń mindetin atqarýshy mamandar baqylap otyr. Qalalyq kópsalaly aýrýhananyń jansaqtaý bóliminde jatqan tórt naýqastyń úsheýi esin jıǵan, jaǵdaılary birtindep jaqsaryp keledi. Bir pasıent áli komada. Taǵy bir zardap shekken azamat oblystyq medısınalyq ortalyqta em qabyldap jatyr», delingen habarlamada.
Esterińizge sala keteıik, Qaıǵyly jaǵdaı 23 qazanda Samara — Shymkent jolynda bolǵan edi. Júk kóligi men jolaýshylar tasymaldaǵan «GAZeldiń» soqtyǵysýy saldarynan apat ornynda 12 adam, onyń ishinde eki júrgizýshi de qaza tapty.
Oqıǵa boıynsha qylmystyq is qozǵaldy. QR Ishki ister mınıstrliginen arnaıy tergeý toby jiberildi. Sonymen qatar, Premer-Mınıstr Oljas Bektenovtiń tapsyrmasymen apat sebepterin anyqtaý úshin úkimettik komıssııa quryldy.
Aktóbe oblysy ákimdiginiń málimetinshe, qaza tapqandardyń otbasylaryna 1 mıllıon teńgeden materıaldyq kómek kórsetiledi.
