Ormanshylardyń jumysy tabıǵatta tynyǵyp júrgendeı kórinetin shyǵar. Alaıda, Altaıdyń bar baılyǵyn qorǵap, qoryp júrgen osylar. Ala jazdaı órtten qorǵasa, qys túse búrshik jınaıdy, zańsyz aǵash kesýdiń aldyn alady. Jyl on eki aı tynymsyz eńbek etedi.
Etekte qara kúz bolǵanymen, Batys Altaıdyń bıigine baıaǵyda qar túsken. Tobyqtan qar keship búrshik jınaýǵa er azamattar ǵana emes, ormanshy áıelder de aralasady. Sonyń biri Nazıra Saıdyǵumarova. Onyń ómirlik serigi Damır de osy ormanshylyqta qyzmet etedi.
– Biz otbasymyzben taýdy, dalany jaqsy kóremiz. Ár maman óz isin unatsa, jumystyń qıyndyǵy joq. Sol úshin de jumysqa barymyzdy salamyz. Qazirgi mindetimiz, búrshik jınaý, ony keptirý, tazalaý, – deıdi ormanshy arý Nazıra Saıdyǵumarova.
Ormannyń osynaý múlgigen tynyshtyǵy esh buzylmaıtyndaı. Degenmen aqyrǵan aıý, jortqan buǵy munda az emes. Olar da qoryqtyń qorǵaýynda. Tumsa tabıǵattan tynyshtyq ketse, ańnyń aýyp ketýi de op-ońaı.
Rıdder orman sharýashylyǵy dırektorynyń orynbasary Damır Saıdyǵumarovtyń aıtýynsha, 300 myń gektar alqapty alyp jatqan mekemede 160-tan astam maman qyzmet etedi. Ár ormanshylyq shashylyp jatqan búrshiktiń 3–4 tonnasyn jınap, ótkizedi. Olar jylyjaıda ábden tamyrlanyp, kúsh alǵan soń ǵana dalaly jerge egiledi. Ábden ósip ketkenshe balasha kútip-baptaıdy. Sóıtip, orman qoryn udaıy tolyqtyryp otyrady.
Shyǵys Qazaqstan oblysy,
Rıdder qalasy
