Aýqymdy týrnırdi Nomad akademııasy men Qazaqstan ústel tennısi federasııasy QR Týrızm jáne sport mınıstrliginiń qoldaýymen uıymdastyrdy. Bıylǵy jarys buryn-sońdy bolmaǵan kólemdi júlde qorymen erekshelendi: jeńimpazdar — 5000, kúmis júldegerler — 2500, al qola ıegerleri — 1500 AQSh dollarynan ıelenedi. Jalpy júlde qory 115 myń dollardy qurady.
Fınal qorytyndylary:
Uldar (U-11) arasynda Ramazan Raýanuly (ShQO) úzdik oıyn órnegin kórsetip, altyn medal ıegeri atandy. Kúmis júldeni shymkenttik Zańǵar Ábdimájıt enshilese, qola medaldar Baqdáýlet Nurjan (Shymkent) men Rasýl Bekbolatqa (Aqtóbe) buıyrdy.
Qyzdar (U-11) sanatynda Shohına Mırkodırova (Shymkent) top jaryp, týrnır jeńimpazy atandy. Ekinshi oryn — qaraǵandylyq Jansaıa Tilegenova, al úshinshi oryndy Tomırıs Tımýrqyzy (Aqtóbe) men Nazerke Bolatbek (Túrkistan) bólisti.
Jasóspirimder (U-16) arasyndaǵy fınalda Álibı Shomanov (ShQO) sheberligimen kózge túsip, chempıon atandy. Kúmis júlde — Asylhan Maǵzumbekovke (Qaraǵandy), qola — Sanjar Ibahan (Túrkistan) men Mansur Súıindikke (Pavlodar) buıyrdy.
Qyzdar (U-16) arasynda Qaraǵandy ókili Marııa Lýkıanova qarsylastaryna des bermeı, altyn júldege ıe boldy. Ekinshi oryn — Aqnıet Amangeldige, al qola medal — Raýana Shymkentbaı (Shymkent) men Noıla Hanııazovaǵa (Túrkistan) buıyrdy.
Aıta keteıik, týrnırdiń sońǵy kúni kórermenderdi álemdik juldyzdar Sıýı Sın, Fan Bo, Verner Shlager jáne Djý Se Hıok qatysatyn áserli shoý-matchtar kútedi. Al 29 qazanda ótetin saltanatty jabylý rásiminde barlyq chempıondar men júldegerler ózderiniń laıyqty marapattaryn alady.
