Dıktatordyń týǵan kúnine pil men arystan soıylady

ASTANA. 19 aqpan. Zımbabve prezıdenti Robert Mýgabeniń alda atap ótiletin týǵan kúnine pil, oǵan qosa, tipti arystan da soıylatyn túri bar. Bul týraly «Gazeta.Ru» habarlady. Jasy 91-ge tolatyn dıktatordyń bul jolǵy týǵan kúni keń kólemde atap ótilgeli otyr. Ol 28 aqpanda Vıktorııa sarqyramasyna jaqyn jerdegi kórikti spa-otelde ótpekshi. Sharaǵa 20 myńǵa jýyq adam shaqyrylypty. Belgili bolǵandaı, merekelik dastarhanǵa as mázirin daıarlaý úshin jalpy quny 105 myń eýrony quraıtyn eki pil, eki býıvol, bes antılopa jáne bir arystan soıylady. Bul janýarlardyń bárin jergilikti fermer jetkizip beredi. Budan bólek, Qytaıdan tike jolmen 27 pil jetkiziledi. Tabıǵatty qorǵaýshylar Zımbabve dıktatorynyń bul áreketin aıyptap jatyr. Buǵan jergilikti turǵyndar da narazy. Olar Mýgabeni baǵaly resýrstardy joıyp jiberip, ornyn qaıta toltyrmaıdy, dep aıyptaýda. Al prezıdentke usynylyp otyrǵan janýarlar onyń jyl saıynǵy ańshylyǵyndaǵy kvotaǵa kiredi eken. Buǵan qosa, bul eldi táýelsizdik alǵaly beri «temir qolymen» basqaryp kele jatqan Mýgabeniń týǵan kúnin dúrildetip birinshi ret toılaýy emes eken. Ol ótken jyly 90-ǵa tolǵanynda áýege 90 shar ushyryp, merekelik dastarhanǵa 90 sıyr soıǵyzyp, salmaǵy 90 kılo keletin pırog pisirtipti. Sol toı memleket úshin 40 mln. dollar shyǵyn ákelgen. Al prezıdent 100-ge tolǵanyn qalaı toılaıtynyn qazirden oılastyryp jatqan sııaqty. El konstıtýsııasyna sáıkes prezıdent memleketti 99 jasqa tolǵansha basqara alady. Murat Aıtqoja.