Premer-Mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıevke joldanǵan depýtattyq saýalda ınternet alaıaqtyq pen derekterdiń zańsyz taralýyna qarsy naqty sharalar qabyldaý qajettiligi aıtyldy.
Depýtattyń aıtýynsha, sońǵy jyldary azamattardyń jeke derekteriniń zańsyz jınalýy men satylýy, onlaın-alaıaqtyq pen nesıe rásimdeý faktileri jıilegen. Memleket qolǵa alǵan sharalarǵa qaramastan, ınternet qylmystary azaımaı otyr. Tek 2025 jyly elimizde 14 myńnan astam ınternet alaıaqtyq oqıǵasy tirkelip, zalal kólemi 6 mlrd teńgeden asqan.
Ábýtálip Mútáliniń derekteýinshe, maýsym aıynda oryn alǵan 16 mıllıonnan astam qazaqstandyqtyń jeke málimetteri taralyp ketken oqıǵa memlekettik jáne kvazımemlekettik júıelerdegi eleýli osaldyqtardy kórsetti.
«Qaýip tek memlekettik sektorda emes, jeke kompanııalarda da bar. Bankter, telekom-operatorlar men marketpleıster adaldyq baǵdarlamalary men qosymshalar arqyly azamattardyń geolokasııalyq derekterin jınap, osal jaǵdaı týǵyzýda», dedi depýtat.
Onyń pikirinshe, qoldanystaǵy aıyppul kólemi iri kompanııalar úshin tejeý tetigine aınala almaı otyr. Sondyqtan ol halyqaralyq tájirıbege súıene otyryp, jeke derekterdiń zańsyz paıdalanylýyna salynatyn jazany kúsheıtýdi usyndy. Máselen, Eýropalyq Odaqta aıyppul kólemi kompanııa aınalymynyń 4 paıyzyna deıin, Qytaıda 5 paıyzyna deıin jetedi.
Sondaı-aq depýtat barlyq zańnamalyq jaýapkershilik normalaryn tıimdi qoldanýdy, jeke derekterdi zańsyz paıdalanǵandarǵa jazany halyqaralyq standarttarǵa saı arttyrýdy, memlekettik jáne kvazımemlekettik IT-júıelerge keshendi aýdıt júrgizýdi, anyqtalǵan qaýip-qaterlerdi joıý josparyn ázirleýdi talap etti.
«Bul qadamdar formaldy sıpatta qalmaýy kerek. Olar azamattardyń naqty qorǵalýyna jáne memlekettik júıelerge senimdi arttyrýǵa baǵyttalýy tıis», dedi Ábýtálip Mútáli.
