Petropavlda «Soltústik Qazaqstan» gazetiniń 95 jyldyǵy atap ótildi

PETROPAVL. 19 aqpan. Alǵashqy nómiri Omby qalasynda 1920 jyly aqpanda «Kedeı sózi» degen atpen shyqqan búgingi «Soltústik Qazaqstan» gazetiniń 95 jyldyǵy oblystyń mádenı-rýhanı ómirindegi aıtýly oqıǵa retinde qarastyrylyp, arnaıy jarııalanǵan   aptalyq sheńberinde atap ótilýde. Bul týraly egemen.kz tilshisi habarlady. On toǵyzynshy aqpandaǵy tutas sanynda elimizdiń, óńirdiń qoǵamdyq-saıası ómirindegi mańyzdy ózgerister men jan súısinerter jaqsy isterdi, qalyptasqan is-tájirıbelerdi talmaı nasıhattap kele jatqan Qazaqstandaǵy baıyrǵy basylymnyń damý tarıhy, ulttyq minberge qalaı aınalǵany, qandaı ult tulǵalary basshylyq jasaǵany, qyzmet etkeni, qazirgi shyǵarmashylyq áleýeti jaıly keńinen baıandalǵan. «Kedeı sózi, «Bostandyq týy», «Keńes aýyly», «Lenın týy» degen ataýlarmen jaryq kórip, til, dil máselelerin ótkir kóterip otyrǵan. Onyń qabyrǵasynda ár kezderi Maǵjan Jumabaev, Smaǵul Sádýaqasov, Qoshke Kemeńgerov, Sábıt Muqanov, Májıt Dáýletbaev, Eljas Bekenov, Shahmet Qusaıynov, Áljappar Ábishev, Ábdildá Tájibaev, Jaqan Syzdyqov, Jumaǵalı Saın, Dıqan Ábilev, Safýan Shaımerdenov, taǵy basqa esimderi elimizge keninen tanys qalamgerler eńbek etken. Merekelik nómirde oblys ákimi Erik Sultanovtyń, Soltústik Qazaqstan oblysynyń qurmetti azamaty, akademık Zeınolla Moldametovtyń, «Egemen Qazaqstan» gazetiniń vıse prezıdenti-bas redaktory Janbolat Aýpbaevtyń, til janashyrlary men oqyrmandardyń júrekjardy quttyqtaý-lebizderi berilgen. «Qyzyljar-Aqparat» medıaholdınginiń dırektory, gazettiń basshysy Káribaı Musyrman arnaý maqalasynda Qyzyljar jurtshylyǵynyń rýhanı shańyraǵynyń El Táýelsizdigine qaltqysyz qyzmeti jóninde paıymdy mysaldar keltirgen. Aptalyq aıasynda oblystyq ákimdikte redaksııa ujymyn qabyldaý, tańdaýly qalam ıelerin marapattaý, jer-jerlerde oqyrmandar konferensııalaryn ótkizý, kezdesýler uıymdastyrý sharalary kózdelgen. О́mir Esqalı. Derek, sýret: egemen.kz.