Foto: Vıdeodan alynǵan kadr
Bıyl qyrkúıek aıynda túsirilim toby elimizdiń ár óńirin aralap, 22 kún ishinde 7436 shaqyrymnan astam jol júrgen. Top músheleri Qazaqstannyń tabıǵı jáne mádenı muralarymen tanysyp, Uly Jibek jolynyń boıyndaǵy kóne Túrkistandy, Mańǵystaýdaǵy Bozjyra shatqalyn, Kaspıı jaǵalaýyn, Almaty oblysynyń Qaıyńdy kóli men Saty aýylyn, Qapshaǵaı sý qoımasyn, sondaı-aq Aqmola óńirindegi Kóbeıtuz kóli men Býrabaı kýrorttyq aımaǵyn aralap shyqty.
Jobaǵa Qazaqstanmen qatar Qytaı, Qyrǵyzstan, Italııa, Malaızııa jáne Serbııa elderiniń tanymal ártisteri qatysqan. Halyqaralyq shyǵarmashylyq ekspedısııanyń maqsaty – tabıǵat pen óner úndestigi arqyly dostyq pen mádenı baılanystardy nyǵaıtý.
«Voice Beyond Horizon» telejobasy 2026 jyly Hunan TV telearnasynyń efırinen kórsetiledi. Jobany júzege asyrýǵa Kazakh Tourism ulttyq kompanııasy, Týrızm jáne sport mınıstrligi, «Jolaýshylar tasymaly» AQ jáne óńir ákimdikteri qoldaý bildirdi.
