Sýretti túsirgen – Iýrıı Bekker
Kórmede hakimniń áýleti, balalyq shaǵy, qorshaǵan ortasy men ómirbaıanyn tanystyratyn arnaıy stendter, fotomaterıaldar men muraǵat qujattary qoıylǵan. Atap aıtqanda, Abaıdyń uly Maǵaýııaǵa 1896 jyly jazǵan haty, aqynnyń óz qoly qoıylǵan qujattar, 1903 jyly berilgen minezdeme, ómir derekterine qatysty kóshirmeler, kitaptar jáne aqyn dáýiriniń kelbetin beıneleıtin jádigerler erekshe oryn alady.
Kóńil aýdarǵan biregeı jádigerlerdiń ishinde aqynnyń báıbishesi Dildániń dombyrasy, baldaǵy men toǵyzqumalaǵy, inisi Ysqaqtyń bórigi, kishi inisi Ospannyń asyrap alǵan qyzy Mansýranyń kamzoly, sondaı-aq urpaǵy Azat Árhamuly Ysqaqov, Semeıdegi Abaıdyń memlekettik qoryq-mýzeıi men Á.Jırenshın taraptarynan qurastyrylǵan Abaı áýleti men týystary jónindegi shejireler jáne birneshe tyń tarıhı fotosýret – kórmedegi qundy materıaldar.
Sol sekildi Abaı Qunanbaıulyna qatysty qoljazbalar, kitap basylymdary hakim murasyna úńilgenderdi beıjaı qaldyrmaıdy. Ekspozısııada ǵalymdar tarapynan Abaıdyń óz eńbegi dep tanylǵan «Biraz sóz qazaqtyń túbi qaıdan shyqqandyǵy týraly» atty biregeı týyndysy, aqyn shyǵarmalary jınaqtalǵan Múrseıit Bikeulynyń (1860–1917) qoljazbasy, Turaǵul Abaıulynyń (1875–1934) «Qazaqtyń ataqty aqyny Abaı Qunanbaıuly» atty qoljazbasy, sondaı-aq Kákitaı men Turaǵul 1909 jyly Sankt-Peterbýrgte bastyryp shyǵarǵan «Qazaq aqyny Ibrahım Qunanbaı oǵlynyń óleńi» atty erekshe basylym kópshilik nazaryna usynylǵan.
Kórmeni ashqan mýzeı dırektorynyń mindetin atqarýshy Serjan Sarov, Ál-Farabı atyndaǵy Qazaq ulttyq ýnıversıteti janyndaǵy Abaı ǵylymı-zertteý ınstıtýtynyń dırektory Janǵara Dádebaıuly, Qazaq ulttyq qyzdar pedagogıkalyq ýnıversıtetiniń professory Rýda Zaıkenqyzy, Fılosofııa, saıasattaný jáne dintaný ınstıtýtynyń bas ǵylymı qyzmetkeri Baqytjan Meńlibekuly, Abaı ǵylymı-zertteý ınstıtýtynyń jetekshi ǵylymı qyzmetkeri Láılá Musaly, Iran Islam Respýblıkasy Bas konsýldyǵynyń mádenı attashesi Hosseın Aǵazade aqyn murasynyń mańyzyn tilge tıek etti. Ǵalymdar Abaı shyǵarmalaryn oqý, bilý, taný, jańǵyrtý men nasıhattaý tek qazaq halqynyń ǵana emes, álem ǵalymdarynyń boryshy ekenine erekshe toqtaldy.
ALMATY
