Ýnıversıtet rektory Gúlzada Shakýlıkovanyń aıtýynsha, bıyl atalǵan fılıalda elimizdiń jastaryn 100 bilim granty bólingen. Munaı-gaz sektoryna qyzyǵýshylyq tanytqan jastar álemdik deńgeıdegi sapaly bilimge qol jetkizdi.
«Biz reseılik áriptesterimizben aradaǵy seriktestik arqyly bolashaq ınjenerler men kásibı mamandardy daıarlaýda jańa beleske qadam bastyq. Fılıalda bilim alatyn jastardan qabyldaý emtıhandaryn I.Gýbkın atyndaǵy ýnıversıtettiń tájirıbeli professor-oqytýshylar quramy júrgizdi», deıdi G.Shakýlıkova.
Reseılik oqý orny fılıalynyń dırektory Vladımır Maıerdiń pikirinshe, qazaqstandyq stýdentter I.Gýbkın ýnıversıtetiniń jetekshi professorlary men tájirıbeli ǵalymdarynan tikeleı dáris alady. Bul – bilim sapasynyń joǵary deńgeıin, sondaı-aq ǵylym men óndiristiń ózara tyǵyz baılanysyn qamtamasyz etetin zor múmkindik.
«Atyraýdaǵy fılıalda jergilikti stýdentterge biregeı bilim berý baǵdarlamalaryn ıgerý úshin zamanaýı zerthanalar, sımýlıasııalyq oqý ortalyqtary ashyldy. Oqý úderisi teorııa men tájirıbeni ushtastyrýǵa baǵyttalady. Stýdentter naqty óndiristik úderisterdi modeldeý, zerthanalyq jumystar júrgizý arqyly sapaly bilim alyp, munaı-gaz salasynda joǵary bilikti ári básekege qabiletti maman bolyp qalyptasady», deıdi V.Maıer.
Sondaı-aq S.О́tebaev atyndaǵy Atyraý munaı jáne gaz ýnıversıtetinde bolashaq munaıshylardy daıarlaıtyn oqý-óndiristik polıgony jumysyn bastady. Ýnıversıtet rektory Gúlzada Shakýlıkovanyń deregine qaraǵanda, polıgonnyń aýmaǵy 4 gektardy quraıdy.
«Bizdiń ýnıversıtettiń basty mindeti – munaı-gaz sektoryna qajetti bilikti mamandardy daıarlaý. Osyǵan oraı munaı kompanııalarymen áriptestik ıntegrasııa aıasynda ashylǵan oqý polıgonyn jer qoınaýyn barlaý, shıkizattyq kómirsýtekti óńdeýge deıingi óndiristik úderisterdiń tolyq sıkli bar munaı-gaz óndirý mekemesiniń shaǵyn modeli deýge bolady. Polıgonda jattyǵý elementteri óndiristik jaǵdaılarǵa barynsha uqsas etip salyndy. Stýdentterdiń naqty operasııalyq mindetterdi sheshýge, munaı-gaz tehnologııalaryn ıgerýge múmkindigi bar. Munda elektrli gazben dánekerleýshi, tokar, operator, mashınıst, basqa da mamandar tájirıbeden ótedi», deıdi G.Shakýlıkova.
Rektordyń málimetine súıensek, oqý ornynda 2015 jyldan beri dýaldy oqytý júıesi qolǵa alynǵan. Endi oqý polıgonynda stýdentter joǵary tutqyrly munaı óndirý men óńdeýde jańa tehnologııalardy meńgeredi. Polıgon jumysyna jasandy ıntellekt (AI) elementteri men sıfrlyq tehnologııalar engizilip jatyr. Onyń ishinde sıfrlyq ken oryndarynyń egizderi (digital twins) úderisterdi modeldeýge, táýekelderdi azaıtýǵa, oqý kezinde shynaıy óndiristik jaǵdaılardy qaıta jańǵyrtýǵa múmkindik beredi. Mundaı erekshelik stýdentterge qondyrǵylardyń jumysyn vırtýaldy ortada synap kórýge, apattyq jaǵdaılardy boldyrmaý úshin sheshimderdi pysyqtaýǵa, tıimdi óndiristik strategııalardy ázirleýge jol ashady.
«Oqý-óndiristik polıgony – batys aımaqta tehnıkalyq bilim berýdiń jańa kezeńiniń alǵashqy qadamy. Eńbek bastysy, eńbek naryǵyna básekege qabiletti mamandardy daıarlaýǵa zor serpin beredi. Polıgon zamanaýı zerthanamen, kásibı daǵdylardy jetildirýge arnalǵan oqý-óndiristik alańdarmen, tájirıbelik qondyrǵylarmen, ınnovasııalyq sheshimderdi testileý alańdarymen jabdyqtaldy. Jerasty jóndeý jumystaryn júrgizýdi úıretý úshin eki uńǵyma burǵylandy. Stýdentterdiń tańdaǵan mamandyǵyna saı praktıkalyq tapsyrmalardy oryndaýy úshin 15 oqý alańy salyndy», deıdi ýnıversıtet rektory.
Atyraý oblysy
