Sýret: gov.kz
Ortalyq PET/KT zertteýinen ótýge Astana, Almaty qalalaryna barýǵa májbúr bolatyn Mańǵystaý oblysy men kórshi óńirlerdiń turǵyndaryna ýaqyt pen shyǵyndy únemdeýge ári jasandy ıntellektiniń kómegimen zamanaýı dıagnostıka jasaýǵa múmkindik beredi.
Mańǵystaý oblysy ákimi baspasóz qyzmetiniń málimdeýinshe, ortalyq jylyna 2000-nan astam zertteý júrgizip, 25 jańa jumys ornyn qurady. Alǵashqy kúnniń ózinde birneshe pasıent PET/KT zertteýinen ótti. Medısınalyq jabdyqtar Germanııa, AQSh, Ońtústik Koreıadan jetkizilgen.
Joba «Orhun Medical» kompanııasy men Mańǵystaý oblysy ákimdiginiń qoldaýymen júzege asty. 2024 jylǵy
4 jeltoqsanda oblys ákimi Nurdáýlet Qılybaı Memleket basshysynyń tapsyrmasyna sáıkes «Orhun Medical» JShS-niń bas dırektory Dırık Gıonenchpen arnaıy kezdesip, Mańǵystaý turǵyndarynyń shetelde emdelýge jumsaıtyn shyǵyndaryn azaıtý, el ishinde medısınalyq qyzmetterdiń qoljetimdiligin arttyrý maqsatynda zamanaýı onkologııalyq ortalyq ashý, qyzmetkerlerdi oqytý jóninde ýaǵdalasqan bolatyn.
О́ńir basshysy Nurdáýlet Qılybaı PET/KT ortalyǵynyń ashylýyn aımaqtarda joǵary tehnologııaly medısınalyq kómekti damytýdyń mańyzdy qadamy dep atap ótti.
– Memleket basshysy densaýlyq saqtaý salasyn damytýǵa basa mán berip keledi. Elimizdiń batys óńirinde tuńǵysh ret qaterli isik sekildi aýrýlardy erte anyqtaıtyn ortalyq bizdiń oblysta ashylyp otyr. Endi jergilikti turǵyndar alysqa barmaı, osynda tolyqqandy tekserýden óte alady. Erte dıagnostıka qoljetimdi bolǵan saıyn, derttiń asqynǵan túrlerin anyqtaý kórsetkishi de tómendeıdi. Osy oraıda, jobaǵa qoldaý kórsetken Úkimetke, Densaýlyq saqtaý mınıstrligine alǵys bildiremiz, – dedi Nurdáýlet Qılybaı.
Qaterli isik aýrýy kóbeıip turǵan kezeńde mundaı ortalyqtyń bolýy óte mańyzdy. Derekterge súıensek, 2025 jyldyń 7 aıynda Mańǵystaý oblysynda qaterli isiktiń túrli satysynda 562 jaǵdaı tirkelgen. Atap aıtqanda, 312 naýqas 1-2 satysynda, 36 naýqas 3-4 satysynda, 157 naýqas 0-1 satysynda anyqtalǵan. Alǵash ret 4-satysynda anyqtalǵandar sany 57 jaǵdaıdy qurady.
Aýyr dertke shaldyqqandardy erte anyqtaý arqyly turǵyndarǵa ómir syılaýǵa sep bolatyn ortalyqtyń ashylýy – óńir medısınasyna qosylǵan tyń múmkindik.
Mańǵystaý oblysy
