Eńbek • 01 Qarasha, 2025

Muǵalimderge suranys joǵary

30 ret

kórsetildi

2 mın

oqý úshin

Keıingi kezde jumys berýshiler Enbek.kz platformasyna 240 myńǵa jýyq bos jumys ornyn jarııalasa, jumys izdeýshiler 138,5 myń túıindeme qaldyrǵan. Ádettegideı, jumys izdeýshilerden jumys berýshilerdiń úles salmaǵy basym.

Sándibek ASANÁLI

Sýret: newsroom.kz

Elektrondyq eńbek bırjasyndaǵy bos oryndar sany 128,9%-ǵa artyp, túıindemeler kerisinshe 6,3%-ǵa azaıǵan. Oqý jylynyń basynda suranystyń basym bóligi muǵalimderge tıesili boldy. Naqtyraq aıtsaq, bilim salasynda 120,7 myń jumys usynylǵan, onyń deni Astana, Almaty qalalarynda. Sonymen qatar aqparat jáne baılanys (17,4 myń), qyzmet kórsetýdiń basqa da salalaryna (17,1 myń), óńdeý ónerkásibine (15 myń) suranys joǵary. Osy tórt sala keıingi kezdegi jalpy suranystyń 70%-dan astamyn quraǵan.

Jumys berýshilerdiń deni joǵary bilikti mamandar izdeıdi. Mundaı mamandardyń úshten ekisi (81,6 myń) – bilim berý, tárbıe salasyndaǵy mamandar. Orta bilikti mamandarǵa suranys – 31% (75,2 myń), biliktiligi joq jumysshylarǵa suranys – 17% (40,4 myń). Bos jumys oryndarynyń ósimi jóninen Almaty oblysy kósh basynda. Odan keıingi oryndarda – Jambyl, Batys Qazaqstan, Aqtóbe, Jetisý oblystary. Jalpy, túıindeme sanynyń azdap tómendegenine qaramastan, kóptegen óńirde jumys izdeýshilerdiń belsendiligi artqan. Bul rette Almaty oblysy men qalasy kósh basynda, úshtikti Túrkistan oblysy túıindeıdi.

Naqty kásipterge qatysty aıtar bolsaq, eń kóp suranysqa ıe mamandyqtar – PR-menedjerler (16,3 myń bos oryn), matematıka pániniń muǵalimderi (7,6 myń), tárbıeshiler (6,1 myń). Orta bilikti mamandar arasynda tárbıeshi kómekshileri (4,4 myń), kúzetshiler (2,7 myń), avtokólik júrgizýshileri (2,6 myń) suranysqa ıe. Jumysyna eń joǵary jalaqy suraǵandar – tehnıkalyq dırektorlar (ortasha 1,2 mln teńge), ushqyshtar (1,2 mln teńge), kommersııalyq dırektorlar (1,1 mln teńge). Jumys berýshiler usynǵan eń joǵary jalaqy – ken óndirý salasyndaǵy seh basshysy (shamamen 843,8 myń teńge), energııamen jabdyqtaý qyzmeti basshysynyń orynbasary (733 myń teńge), IT salasyndaǵy baǵdarlamalar bas redaktory (718 myń teńge) laýazymdary.

Jalpy, keıingi kezderi joǵary bilikti jumys kúshine degen suranystyń óskeni baıqalady. Bul ósim bilim salasyndaǵy maýsymdyq faktorlarmen, atap aıtqanda, muǵalim, tárbıeshi, olardyń kómekshilerine suranys kóbeıgenimen baılanysty bolyp otyr.