Kezdesý «Ulttyq qor – Qazaqstan balalaryna. Innovasııalyq saıasat jáne jahandyq yqpal etý áleýeti» atty halyqaralyq sımpozıým sheńberinde ótti. Sharaǵa Sıngapýr, AQSh, Qytaı, Mońǵolııa, Koreıa jáne Ázirbaıjan ýnıversıtetterinen kelgen onnan astam sarapshy delegasııa qatysty.
Washington University in St. Louis ókilderi Qazaqstanǵa «Ulttyq qor – balalarǵa» baǵdarlamasynyń tájirıbesin zerdeleý maqsatynda kelgen. Sımpozıým atalmysh amerıkalyq ýnıversıtettegi áriptesterdiń bastamasymen uıymdastyryldy.
Vashıngton ýnıversıtetiniń Áleýmettik damý ortalyǵynyń (CSD) halyqaralyq dırektory Lı Zoý Qazaqstannyń bastamasyn joǵary baǵalap, ony álemge úlgi bolarlyq jańashyl joba dep atady.
– «Ulttyq qor – balalarǵa» baǵdarlamasy búkil álem úshin úlgi bolarlyq revolıýsııalyq bastama ekenin aıtqym keledi. Bul joba – sizderdiń Prezıdentińizdiń strategııalyq kózqarasynyń nátıjesi jáne qalalarda nemese aýyldarda turatynyna qaramastan, eldegi barlyq balaǵa ınvestısııa salýǵa degen umtylysynyń kórinisi. Qazaqstannyń jeti mıllıon balasynyń bári osy kóregen jobanyń benefısıarlary bolyp tabylady, – dedi Lı Zoý.
Onyń aıtýynsha, bul baǵdarlama Qazaqstan úshin de, óńir úshin de jáne jahandyq deńgeıde de mańyzdy bastama bolyp sanalady. Sondaı-aq, ol sımpozıýmnyń qazaqstandyq stýdentter men azamattar, sondaı-aq halyqaralyq sarapshylar arasyndaǵy tájirıbe almasýǵa jáne bilim keńistigin keńeıtýge múmkindik bergenin atap ótti.
Dınara Zákıeva óz kezeginde sheteldik ýnıversıtet ókilderiniń Qazaqstan tájirıbesine qyzyǵýshylyq tanytýy eldiń áleýmettik saıasatyndaǵy júıeli ózgeristerdiń nátıjesi ekenin aıtty. Onyń sózinshe, «Ulttyq qor – balalarǵa» baǵdarlamasy – bolashaq urpaqtyń áleýetine ınvestısııa salýǵa baǵyttalǵan mańyzdy áleýmettik bastama.
– Bul baǵdarlama árbir balanyń ál-aýqatyn arttyrýmen qatar, qoǵamnyń ádildik pen teń múmkindikter qaǵıdatyna negizdelgen damýyna serpin beredi. Qazaqstan tájirıbesine halyqaralyq sarapshylardyń joǵary baǵa berýi – eldiń balalarǵa baǵyttalǵan memlekettik saıasatynyń tıimdiligin dáleldeıdi, – dedi Dınara Zákıeva.
Ombýdsmen sondaı-aq «Ulttyq qor – balalarǵa» jobasy halyqaralyq deńgeıdegi yntymaqtastyq pen bilim almasý alańyna aınalyp otyrǵanyn atap ótti.
