Premera 500-den astam bala men ata-analardyń qatysýymen ashyq aspan astynda úlken LED-ekranda ótti.
Anımasııalyq joba óskeleń urpaqtyń quqyqtyq mádenıetin qalyptastyrýǵa, kámeletke tolmaǵandar arasyndaǵy quqyq buzýshylyqtyń aldyn alýǵa jáne "Zań men tártip" ıdeologııasyn ilgeriletýge baǵyttalǵan. Fılmniń negizgi maqsaty – balalarǵa zańnyń, ádildiktiń jáne qoǵamdyq tártiptiń mańyzyn qyzyqty ári túsinikti túrde jetkizý, sondaı-aq zańǵa qurmet pen adaldyqtyń – myqty ári jaýapty azamat bolýdyń kepili ekenin kórsetý.
Mýltfılmniń basty keıipkeri – Qazaqstannyń táýelsizdigi men qaısar rýhyn beıneleıtin Barys. Ol balalarǵa adaldyq, ádildik, dostyq pen ózara syılastyqtyń qundylyǵyn túsindiredi. Kórsetilim jyly ári merekelik atmosferada ótti. Balalar úshin jol qozǵalysy erejelerine arnalǵan vıktorınalar, kınologtar men arnaıy jasaqtyń tanystyrylymdary uıymdastyryldy. Sondaı-aq krımınalısterdiń jumysy kórsetilip, polısııa qyzmetine arnalǵan fotokórme qoıyldy.
Merekelik shara qýyrshaq teatry men Shymkent sırki ártisteriniń qoıylymdarymen tolyqty. Jol qozǵalysynyń jas ınspektorlary jol qaýipsizdigi týraly shaǵyn kórinis kórsetip, kórermenderdiń yqylasyna bólendi. Is-shara sońynda konserttik baǵdarlama usynylyp, qatysýshylar izgi nıettiń sımvoly retinde túrli-tústi sharlardy aspanǵa ushyrdy.
Joba avtorlarynyń aıtýynsha, "BalaZan" tek mýltfılm ǵana emes, balalarǵa zańnyń, ádildiktiń jáne ózara qurmettiń mańyzyn jarqyn beıneler men qyzyqty oqıǵalar arqyly jetkizetin tárbıelik bastama bolyp tabylady.
— Biz ár balanyń zańdy qorǵan ári ádildik nyshany retinde túsinýin maqsat etemiz. Eger bala kezden zańǵa qurmet sezimin qalyptastyrsaq, ádildikti baǵalaıtyn, tártipti ustanatyn urpaq ósedi, — dedi polısııa departamentiniń ókilderi.
Aıta keteıik, anımasııalyq joba jalǵasyn tabady. Kelesi bólimderde Barys balalarǵa qaýipsizdik, adaldyq jáne jaýapkershilik týraly jańa oqıǵalar arqyly sabaq bermek.
