Naýqas – 54 jasta. Dıagnozy: MELD – 26 ball, baýyr sırrozy.
«Naýqas birneshe jyl boıy gastroenterologtyń dıspanserlik baqylaýynda bolǵan. Uzaq ýaqyt em qabyldaǵanyna qaramastan, jaǵdaıy nasharlap, baýyr transplantasııasy ómirin saqtap qalýdyń jalǵyz joly boldy», - dep jazdy portal.
Donor – naýqastyń 24 jastaǵy uly. Ol óz erkimen donor bolýǵa kelisim berip, tolyq medısınalyq tekserýden ótken. Absolıýttik qarsy kórsetilimder anyqtalǵan joq.
Operasııany A.N. Syzǵanov atyndaǵy Ulttyq ǵylymı hırýrgııa ortalyǵy men Túrkistan oblystyq klınıkalyq aýrýhanasynyń mamandarynan quralǵan birlesken komanda ótkizdi.
Qazirgi tańda naýqas dárigerlerdiń dınamıkalyq baqylaýynda. Operasııadan keıingi kezeń asqynýsyz ótip jatyr, transplantasııalanǵan baýyrdyń qyzmeti birtindep turaqtanýda.
Bul – Túrkistan oblysynda jasalǵan ekinshi baýyr transplantasııasy. Atalǵan mańyzdy oqıǵa óńirdegi transplantologııanyń damýyna jańa serpin berdi.
