Erekshe mekenniń sulýlyǵyn tamashalaýǵa keletin týrısterdiń qaýipsizdigin qamtamasyz etýge baǵyttalǵan 7 kórinis alańy jańadan jabdyqtaldy. Jobanyń artyqshylyǵy - ekojúıege túsetin rekreasııalyq júktemeni azaıtýǵa basymdyq berilgen.
«Býrabaı» MUTP buqaralyq aqparat quraldary úshin uıymdastyrǵan baspasóz týry barysynda osy 7 alańnyń árqaısysy ózinshe sulý tabıǵatty jańa qyrynan tamashalaýǵa múmkindik beretinin baıqadyq.
«Bıshi qaıyńdar» saıabaǵynda únemi terbelip, bılep turǵandaı áser qaldyratyn aq qaıyńdardyń arasynda otbasylyq demalysqa arnalǵan oıyn aımaqtary, átkenshekter men sporttyq qurylǵylary bar jaıly keńistik ornalasqan. Adamnan úrikpeı, jaıbaraqat jańǵaq shaǵyp júrgen tabıǵattyń erkesi tıinder men kólde emin-erkin, syzyla júzgen úırekter de janǵa jaılylyq syılap turǵandaı. Kól jaǵasyna sýdyń sybdyryn sezinýge arnalǵan arnaıy oryndyq qoıylypty. Bul jerde uzaǵyraq otyrǵan adam, sý dybysynyń san qubylatynyn ańǵarady eken.
«Aıýtas» jartasynyń joǵary jaǵyndaǵy terassada «Qumaı tazy» músini ornatylǵan. Bul jartastyń ereksheligi taýdyń basynda aıý men qasqyrǵa uqsas eki tas biriktirilgen. Aıý jardyń shetinde eńkeıip, shyńyraýǵa qarap otyr, al qasqyr azý tisterin aqsıtyp, tumsyǵyn tik kóterip artynan ańdyp kele jatyr. El aýzyndaǵy ańyz boıynsha bul jerde analyq aıý men onyń qonjyqtary ómir súrgen. Qonjyqtaryn qorǵaý úshin ol qasqyrmen aıqasqan. Aıý aqyryn jyljyp, jorǵalap, qonjyqtaryn qaýpsiz jerge súırep aparǵan. Biraq ózi tasqa aınalǵan. Sodan beri júrek jutqan aıýdyń júrisin beıneleıtin «Jorǵa aıý» kúıi paıda bolǵan eken.
147 metr bıiktikte ornalasqan «Bólektaý» taýynyń kórinis alańynda qanatyn keńge jaıǵan búrkit beınesi ornatylǵan. Taýǵa kóterilgende aldan tańǵajaıyp panorama ashylady. Shyńnan Býrabaı kóli, Aınakól kóli (Úlken Shabaqty) Jumbaqtas jartasy, Oqjetpes taýy jáne Kókshe shyǵanaǵynyń kórinisi kórinedi. El aýzyndaǵy áńgimege sensek dál osy jerde «japyraq tárizdi energııa aǵashy» ósedi. Taýǵa kóterilgen adamdar kúsh jınap, energııa alyp qaıtady. О́ıtkeni bul jerde tilekter oryndalyp, naǵyz keremetter oryn alady.
«Kebistas» jartasyndaǵy alańda oshaq orny jáne áıel beınesindegi músini bar terassa qoıylǵan. Bul jerden kól jaǵalaýy men qaraǵaıly ormannyń kórinisi kóz tartady.
Park aýmaǵyndaǵy aıryqsha orynnyń biri «Mahabbat alańy». Romantıkalyq atmosfera beretin alańnyń jumsaq landshaftyq dızaıny ǵashyq jandarǵa keremet áser syılaıdy. Fotosessııaǵa jáne demalýǵa qolaıly jaǵdaı jasalǵan.
Kópirlermen jalǵanǵan úsh kórinis platformasy bar «Maksımka» jartasyndaǵy, «Moınaq jartasy» jáne «Imanaı bulaǵyndaǵy» kórinis alańdarynyń da ásemdigi kópshiliktiń kózin súısindirdi. Barlyq alańdar arnaıy baspaldaqpen, oryndyqtarmen, músindermen, aqparattyq taqtalar jáne taýly kórinisti tamashalaýǵa arnalǵan dúrbilermen jabdyqtalǵan.
Týrısterge tańǵajaıyp kóńil-kúı syılaıtyn taǵy bir oryn kıiz úı pishindes «Kúıgen múıis» alańy. Art-obektiler men erekshe besedkalarmen bezendirilgen bul aýmaqtan taýlardyń ústinen kúnniń batýy keremet kórinedi. Keń baıtaq qazaq dalasynda 130-dan astam ózge ult ókilderi tatý-tátti ómir súrip jatyr. Terassada kıiz úıdiń ornalasýynyń ózi elimizdegi etnostyq birlikti, yntymaq pen tatýlyqty pash etip tur.
Jobalaýshy kompanııanyń tehnıkalyq dırektory Raýan Táttibaıdyń aıtýynsha barlyq sholý alańdaryn ornalastyrý kezinde birde bir aǵashqa zaqym kelmegen.
- Býrabaıdy tamashalaýǵa jyl saıyn 1,5 mlnnan astam týrıst keledi. Qanshalyqty ınfraqurylym jetildirilse, sonshalyqty kelýshilerdiń de sany arta túsedi. Osy jobany qolǵa alǵan sátten bastap, jaılylyǵy men ádemiliginen bólek, tabıǵatqa eshqandaı zııan kelmeýine basa mán berdik. Qurylys jumystary kezinde eshqandaı aǵash kesilmedi. Barlyǵyn óz ornynda qaldyrýǵa tyrystyq. Basty maqsatymyz týrısterdiń qaýipsizdigin qamtamasyz etý, olarǵa erekshe áser syılaý boldy. Jeti sholý alańyn qazaq halqynyń mańyzdy sımvoldarynyń biri jeti qazynamyzǵa arnadyq. О́ıtkeni, bul jerge shet elderden de kóptegen týrıster keledi. Sheteldikterge ulttyq qundylyǵymyzdy osylaı dáriptegemiz keldi. Ár lokasııada ornalasqan aqparattyq taqtada qazaq,orys,aǵylshyn tilderinde tabıǵı mekenniń tarıhy, olar týraly halyq ańyzdary, jalpy sıpattamasy jazylǵan,-deıdi R.Táttibaı.
Sońǵy jyldary parktyń tanymal aımaqtaryna kelýshilerdiń sany artqanyna qaramastan , qorǵalatyn aımaqtaǵy tártip buzýshylyq jaǵdaılary azaıǵan. Bul oraıda tabıǵattyń tazalyǵyna atsalysyp júrgen ormanshylardyń eńbegi orasan.
Jańadan jabdyqtalǵan kórinis alańdary – tabıǵat pen týrızmniń úılesimdi damýyna jol ashyp, týrıster endi elimizdiń injý-marjanyn bıikten tamashalaı alady.
