Astana qalasy Polısııa departamentiniń málimetinshe, patrýldik polısııa reıd kezinde Mazda markaly avtokóligin toqtatyp, júrgizýshiniń jaǵdaıyna kúmán keltirgen. Medısınalyq saraptama nátıjesinde áıeldiń alkogoldik mas kúıde bolǵany dáleldendi.
Tekserý barysynda júrgizýshiniń azamattyq ister jónindegi aýdanaralyq sottyń sýdıasy ekeni anyqtalǵan. Qazir ol saraptamaǵa jiberilip, avtokóligi aıyp turaǵyna qoıyldy.
- Avtokólik kommýnaldyq turaqqa qoıylyp, tekserý júrgizilip jatyr. Kólikti mas kúıinde basqarý – zańnyń óreskel buzylýy jáne aınaladaǵy adamdardyń ómiri men qaýipsizdigine qater tóndiredi. Mundaı quqyqbuzýshylyqtar qatań túrde toqtatylady, – dep málimdedi Astana qalasy Polısııa departamentiniń baspasóz qyzmeti.
Qazirgi ýaqytta ustalǵan azamatqa qatysty qyzmettik tekserý bastaldy.
Quqyq qorǵaý organdary atap ótkendeı, mas kúıinde kólik basqarý faktisi boıynsha jaýapkershilik barlyq azamattarǵa birdeı qoldanylady – zań aldynda eshkimniń artyqshylyǵy joq.
