• 08 Tamyz, 2015

Apatqa ushyraǵan avtobýs salonynda Qazaqstan azamattary da bolǵan

370 ret

kórsetildi

2 mın

oqý úshin

Egemen Qazaqstan

Tamyzdyń 6-sy kúni keshke Túrkııada salonynda Qazaqstannyń, Reseıdiń, Lıtvanyń jáne Belarýstiń azamattary otyrǵan týrıster avtobýsy iri jol apatyna ushyrady. Tótenshe jaǵdaı Anadoly jeriniń ońtústik-batys qaptalyndaǵy Denızlı qalasy mańynda Astana ýaqyty boıynsha saǵat 19:30-da oryn aldy. Avtobýs Pamýkkaleden Antalııaǵa qaraı jol júrip bara jatqan eken. Apat saldarynan 4 adam qaza taýyp, 38 adam jaraqat alǵan. Avtobýsta bolǵan reseılik Zınaıda Bogdanova «Rossııa-24» telearnasynyń efırinde aýdarylǵan avtobýstyń quzǵa túsip kete jazdaǵanyn aıtty. «Biz terezeden qulap tústik, qaza bolǵandar óte kóp», – dedi ol. «Jańbyr jaýyp ótkennen keıin jol taıǵaq boldy. Júrgizýshi jyldamdyqty asyryp jiberse kerek, tizginge ıe bola almady. Avtobýs taıǵanaqtaı bastady, shofer quzǵa qulamaýy úshin ony jolda ustap turmaqshy boldy. Muny ol oryndaı aldy. Kólik aýdarylyp ketkenimen, quzǵa qulaǵan joq», – dedi Bogdanova. Qazaqstan Syrtqy ister mınıstrligi Túrkııadaǵy jol apatyna baılanysty túsinikteme bere kelip, aýdarylyp qalǵan avtobýstyń ishinde elimizdiń 7 azamaty bolǵanyn málimdedi. Qazirgi tańda dıplomatııalyq vedomstvo qyzmetkerleri osyndaǵy 5 otandasymyzben baılanysqa shyǵyp úlgergen. Olar jol-kólik oqıǵasy kezinde jaraqat alyp, aýrýhanaǵa túsken. Alaıda, ómirlerine qaýip tónip turǵan joq. Al taǵy eki azamat izdestirilip jatyr. Vedomstvo baspasóz qyzmetiniń sonymen birge jol apatyna ushyraǵan avtobýsta bolǵan jerlesterimizdiń kimder ekenderin de atap kórsetti. Olar Sholpan Turǵanbekova (22.08.1989), Toǵjan Turǵanbekova (25.04.1993), Aıdyn Tileýbaeva (14.07.1999), Azamat Tileýbaev (25.05.1992), Gúlnar Tileýbaeva (04.01.1966), Zarına Soloeva (05.11.1993), Aıda Sarabaeva (21.09.1996) esimdi azamattar bolyp shyqty. Baspasóz ókilderiniń málimetinshe, 19 jastaǵy Aıda Sarabaevanyń qaza tapqany belgili boldy. Al qalǵandary Denızlı qalasynyń túrli emhanalaryna jetkizilgen. Jol-kólik apatynyń sebepteri anyqtalyp jatyr, avtobýs júrgizýshisi ustaldy. Tergeý jumystary júrip jatyr. Qurysh NURYMBET.