Ekonomıkalyq ósimniń basty mańyzy – onyń halyqtyń ómir sapasyna áser etýinde.
Sońǵy jyldary qazaqstandyqtardyń ómir salty edáýir ózgerdi. Ishki týrızm kólemi shamamen 40 paıyzǵa artyp, 6,6 mıllıonnan 10,5 mıllıon adamǵa jetti. Shetelge shyqqan saparlar sany úsh ese kóbeıip, 1,19 mıllıon adamdy qurady.
Kólik salasynda da ósim baıqalady. Áýe tasymalynyń kólemi 14,4 mıllıon jolaýshyǵa jetse, taksı qyzmetine suranys 35 paıyzǵa artqan: 2018 jyly 54,3 mıllıon adam taksı paıdalansa, 2024 jyly bul kórsetkish 73,3 mıllıon adamǵa deıin ósken.
2020 jyldan beri jyljymaıtyn múlik ıeleriniń sany 3,85 mıllıonnan 4,98 mıllıonǵa deıin kóbeıdi. Bul sońǵy bes jylda 1,13 mıllıon adamnyń óz baspanasyn ıelengenin kórsetedi.
Qazaqstandyqtardyń turmys ádetteri men tutyný mádenıeti ózgerýde. Azamattar sapaly taǵam tańdaýǵa kóbirek kóńil bólip, et pen jemis-jıdek tutyný kólemin arttyrǵan.
Áleýmettik osal toptarǵa arnalǵan azyq-túlik sebetiniń quramy burynǵy 20 ataýdan 43 pozısııaǵa deıin keńeıtildi. Bul halyqtyń azyq-túlik qaýipsizdigin qamtamasyz etý jáne áleýmettik teńsizdikti azaıtý baǵytyndaǵy mańyzdy qadam boldy.
Qalalar men aýyldarda gazdandyrý, kóshe jaryǵyn ornatý, aýlalardy abattandyrý jáne joldardy jóndeý jumystary júrgizilýde. Mundaı ózgerister ásirese óńirlerde aıqyn baıqalady. Bul tek ınfraqurylymdyq jetistik emes, jańa ómir sapasynyń negizi sanalady.
Ekonomıkalyq ósim – el damýynyń mańyzdy ındıkatory. Degenmen búginde basty nazar sandyq emes, sapalyq ósimge baǵyttalýy tıis. Iаǵnı, ol halyqtyń turmys deńgeıiniń artýy, qyzmet kórsetý sapasy, bilim men kásipkerlik múmkindikteriniń keńeıýi, ınfraqurylymǵa qoljetimdilik arqyly baǵalanýy qajet.
Sarapshynyń pikirinshe, ekonomıkalyq ósimniń nátıjesi halyqtyń kúndelikti ómirinde – kólik, tutyný jáne ınfraqurylym arqyly sezile bastady. Al sapaly ósim – tek sandarmen emes, turaqty jumys oryndary men qoljetimdi áleýmettik qyzmetter arqyly kórinetin jańa damý kezeńi.
