FIFA 2022 jylǵy álem chempıonaty merzimin bekitti

ASTANA. 21 naýryz. FIFA 2022 jyly Katarda ótetin fýtboldan álem chempıonaty merzimin resmı túrde bekitti. Bul týraly «Chempıonat.com» habarlady. Chempıonat 2022 jylǵy 18 jeltoqsanda márege jetedi. Budan buryn FIFA-nyń bas hatshysy Jerom Valke jahandyq jarystyń ádettegiden 4 kúnge azaıyp, 28 kúnge sozylatynyn aıtyp edi. Osy máýlitpen esepteı kelgende, birinshiliktiń 21 qarashada bastalatynyn bilýge bolady. Jaqyn kúnderde federasııanyń jumys toby ulttyq quramalardyń 2019-2022 jyldar kezeńindegi kúntizbesin jasaýǵa kirisedi. Katar chempıonatty ótkizý quqyǵyn 2010 jylǵy jeltoqsanda jeńip aldy. Sol kezde-aq bul mýndıaldyń qys aılarynda ótkiziletini aıtyldy. Sebebi, jazda aýa raıynyń ystyqtyǵy adam tózbesteı bolatyn bul elde tek salqyn kezde ǵana jarys ótkizýge bolatyn edi. Osydan keıin álemdegi birqatar buqaralyq aqparat quraldary katarlyq Mohamed bın Hammamnyń 2022 jylǵy álem chempıonatyn óz elinde ótkizýin qoldaýlary úshin birqatar fýtbol sheneýnikterine para bergeni týraly qaýeset burq ete ualǵan. Al atqarý komıtetiniń múshesi Frans Bekkenbaýer osy ınsıdentti tekserýge kómek berýden bas tartqany úshin 90 kún jumystan shettetildi. Biraq para berilgeni jónindegi aqpardy rasqa shyǵarýdyń oraıy kelgen joq. Damır Qojamqul.