Sýretti túsirgen – Erlan OMAR, «EQ»
«Bólektaý» ekologııalyq baǵyty tabıǵaty kórkem aýmaq arqyly ótedi. Ol kireberis qaqpadan bastalyp, demalys aımaǵyndaǵy oryndarǵa jetpeı aıaqtalady. Bul qashyqtyqtaǵy jol taýǵa shyǵatyn týrısterge qaýip tóndirýi múmkin baǵyttardyń biri. Endi abattandyrylǵan marshrýt belsendi saıahatshylardan bastap, balalary bar otbasylarǵa deıingi kelýshilerdiń keń aýqymyna da qoljetimdi boldy.
– Ekologııalyq, tanymdyq týrızmdi damytý – basty basymdyqtardyń biri. Bul salaǵa jeke sektordyń belsendi atsalysýy asa mańyzdy. Býrabaıdaǵy ekomarshrýttyń abattandyrylýy – bıznestiń uzaqmerzimdi, áleýmettik mańyzdy bastamalarǵa ınvestısııa sala alatynynyń naqty úlgisi. Bul tek týrıstik ınfraqurylymdy jaqsartýmen shektelmeı, tabıǵatqa degen jaýapkershilikti de qalyptastyrady. Bıznestiń memleketpen tıimdi áriptestigi turaqtylyqty, qoljetimdilik pen sapany damytýǵa yqpal etedi, – dep atap ótti «Kazakh Tourism» UK» AQ Basqarma tóraǵasynyń mindetin atqarýshy Danıel Serjanuly.
Jobaǵa Home Credit Bank qarjy bólip, «Býrabaı» ulttyq parkimen Aqmola oblysy ákimdiginiń týrızm basqarmasymen seriktese otyryp júzege asyrdy. Bastama banktiń elimizdegi qyzmetiniń 20 jyldyǵyna arnalǵan aýqymdy baǵdarlamanyń bir bóligine aınaldy.
– Bul joba jaı abattandyrý ǵana emes, biz zamanaýı, qaýipsiz ári ádemi demalys ornyn qalyptastyrýdy maqsat tuttyq. Munda serýendep kelýshilerdiń Bólektaýdyń biregeı tabıǵaty týraly jańa dúnıelerdi tanyp-bilýine múmkindik týdyryp, qorshaǵan ortaǵa qamqorlyqty da kórsetkimiz keldi. Bizdiń komanda men seriktesterimiz sonshalyqty ynta-yqylaspen jasaǵan ekomarshrýtqa ulttyq saıabaqtyń qonaqtary uqyptylyqpen qaraıdy dep senemiz, – deıdi Home Credit Bank Basqarma tóraǵasy Kırıl Bachvarov.
Baǵyt boıynda Bólektaýdyń florasy, faýnasy, ańyzdary týraly aqparattyq stendter ornatylǵan. Sonymen birge qazaq, orys, aǵylshyn tilderindegi aýdıogıdti qoldanýǵa qajetti QR-kodtar qarastyrylǵan. Joldy abattandyrý barysynda ekologııalyq taza materıaldarǵa erekshe mán berilgen. Ortalyq stend kún sáýlesi túsken kezde aýany tazartatyn ınnovasııalyq fotokatalıtıkalyq jabynmen jasalǵan.
Jaıaý serýendeıtin týrıster úshin ekologııalyq joldyń ashylýy úlken mańyzǵa ıe. Alǵashqy kelýshiler marshrýtty júrip ótip, aýdıogıdti synap kórip, kvest tapsyrmalaryn baǵalaýǵa múmkindik aldy.
Aqmola oblysy
