Dmıtrıı Balandın júzý buqaralyq sportty damytý men halyqtyń densaýlyǵyn nyǵaıtýdyń negizgi baǵyttarynyń biri retinde qarastyrylatynyn atap ótti. Onyń aıtýynsha, júzýdi úıretý – sýdaǵy jazataıym oqıǵalardyń aldyn alýda da mańyzdy ról atqarady.
- Federasııa júzýdi buqaralyq sportty damytý, halyqtyń densaýlyǵyn nyǵaıtý jáne sýdaǵy qaıǵyly jaǵdaılardyń aldyn alý maqsattaryn biriktiretin strategııalyq mańyzdy baǵyt retinde qarastyrady, — dedi Balandın.
Ol Dúnıejúzilik densaýlyq saqtaý uıymynyń derekterine súıene otyryp, 2024 jyly álem boıynsha 236 myńnan astam adamnyń sýǵa batyp qaza tapqanyn, onyń ishinde 82 myńy 1–14 jas aralyǵyndaǵy balalar ekenin atap ótti.
- Bul kórsetkishter halyqty júzýdiń qarapaıym daǵdylary men sýda qaýipsiz júris-turys erejelerine úıretýdiń qanshalyqty mańyzdy ekenin kórsetedi, — dedi federasııanyń bas hatshysy.
Dmıtrıı Balandınniń aıtýynsha, Bilim mınıstrligimen birlesip júzý sabaqtaryn dene shynyqtyrý páni aıasynda mektep baǵdarlamasyna engizý jumystary júrgizilip jatyr.
Balandınniń aıtýynsha, bul bastama halyqaralyq tájirıbege negizdelgen.
- Atalǵan bastama AQSh, Aýstralııa jáne Vengrııa sııaqty elderdiń úlgisimen júzege asyrylady. Bul memleketterde balalardy mektep júıesinde júzýge úıretý kóp jyldan beri sátti engizilip keledi, — dep qosa ketti Balandın.
Joba pılottyq formatta 2026 jyly Almaty men Astana qalalarynda iske qosylyp, keıin búkil el boıynsha kezeń-kezeńimen engizilmek.
